കാക്കപ്പൊന്നിന്റെ കാനനഭംഗി

ചരിത്രം തുടികൊട്ടുന്ന ഭൂമിയാണ് അച്ചൻകോവിൽ ഭക്തിയുടെ പെരുമ്പറമുഴക്കുന്ന, അഭ്രഖനനത്തിന്റെ അവശേഷിപ്പുകൾ പേറുന്ന ഗ്രാമം

- GY OTHILAL

അച്ചൻകോവിൽ-കേൾക്കുമ്പോൾ, മനസ്സിലെത്തുന്നത് അയ്യപ്പക്ഷേത്രമാവാം. ശബരിമല വിശ്വാസികൾ അങ്ങോട്ട് പോകും വഴി അവിടെയും സന്ദർശിക്കാറുണ്ട്. ഈ കാനനക്ഷേത്രത്തെ ചുറ്റിപ്പറ്റി വിശ്വാസങ്ങളുടെയും ഐതിഹ്യത്തിന്റെയും വലിയൊരു ലോകമുണ്ട്. ഇനി നിങ്ങൾ വിശ്വാസിയല്ലെന്നിരിക്കട്ടെ, കാടിഷ്ടപ്പെടുന്ന, പ്രകൃതിസ്നേഹിയായ, കൗതുകങ്ങൾ തേടുന്ന സഞ്ചാരിയാണെങ്കിലും ഈ ഗ്രാമവഴികളിൽ പലതും കാണാനുണ്ട്.

കൊല്ലം പുനലൂരിൽ നിന്ന് നാലുകിലോമീറ്റർ മാറി അലിമുക്ക് എന്നൊരു കവലയുണ്ട്. അവിടെനിന്ന് കാട്ടിലൂടെയുള്ള യാത്ര ചെയ്താൽ മൈക്കാമൺ എന്ന സ്ഥലത്തെത്തും. പിറവന്തൂർ പഞ്ചായത്തിലുള്ള ഈ പ്രദേശത്തിന് ചില പ്രത്യേകതകളുണ്ട്. റോഡിൽ നിന്ന് അല്പം അകത്തോട്ട് നടക്കാം. രണ്ട് വലിയ കുളങ്ങൾ കാണാം. കുളക്കരയിലെ അഭ്രമാലിന്യങ്ങളിലൂടെ നടക്കുമ്പോൾ, പതുപതുത്ത മണ്ണിന് "കാക്ക പൊന്നിന്റെ തിളക്കമുണ്ട്. ഷൂവിലും പാന്റിലുമെല്ലാം തിളങ്ങുന്ന അഭ്രം  പറ്റിപ്പിടിക്കും. കേരളത്തിലെ ഏക അഭ്രഖനനകേന്ദ്രമായിരുന്നു ഇത്. ഇതിന്റെ ആഴങ്ങളിൽ മൂന്ന് തുരങ്കമുണ്ട്. തുരങ്കമിടിഞ്ഞ് പൊലിഞ്ഞ കുറെ ജീവിതങ്ങളുടെ ഓർമകളുണ്ട്.

അഭ്രം തിളങ്ങുന്ന മണ്ണ്

നൂറുവർഷങ്ങൾക്കുമുൻപ് ബ്രിട്ടീഷുകാർ വൻതോതിൽ അഭം ഖനനം ചെയ്തിരുന്ന നാട്. പിന്നീട്, സ്വദേശികളിലൂടെയും 1961 വരെ അത് തുടർന്നു. ഖനനം നിലച്ചശേഷം 1963-ൽ പുനരാരംഭിച്ചെങ്കിലും വീണ്ടും നിലയ്ക്കുകയായിരുന്നു. 1975-ലും ചിലർ ഖനനത്തിനായെത്തി. പിന്നെ, പൂർണമായും നിലച്ചു. മറ്റേതെങ്കിലും രാജ്യത്തായിരുന്നെങ്കിൽ, ഇത് വിനോദസഞ്ചാരഭൂപടത്തിൽ ഇടം പിടിച്ചേനേ. ചരിത്രവും ഓർമകളും അയവിറക്കുന്ന തീം പാർക്കെങ്കിലും വന്നേനേ. ഇവിടെ ആരും ശ്രദ്ധിക്കാതെ, നിശ്ശബ്ദം നിലകൊള്ളുകയാണ്, ഈ കാക്കപ്പൊന്നിന്റെ മണ്ണ്.