കാടിനുള്ളിലെ തടാകം

ലക്നാവരം തടാകത്തിൽ ചരിത്രത്തിന്റെ അലകളിളകുന്നുണ്ട്. പ്രൗഢമായ ഭൂതകാലക്കുളിരുചൂടി ഈ ജലാശയം സഞ്ചാരികളെ വരവേൽക്കുന്നു

- REESHMA DAMODAR

സുന്ദരവും പ്രൗഢവുമായിരുന്നു കാകതീയരാജാക്കന്മാരുടെ രാജ്യം. കൊത്തുപണികളുടെ കഥകൾ പറയുന്ന ക്ഷേത്രങ്ങളും ചെറുത്തു നിൽപ്പിന്റെ അടയാളങ്ങളുള്ള കോട്ടകളും തടാകങ്ങളും അങ്ങനെ എന്തെല്ലാം. ആ ഭൂതകാലത്തിന്റെ അവശേഷിപ്പുകൾ ഇപ്പോഴും വാറങ്കലിലുണ്ട്. അതിലൊന്നാണ് ലക്നാവരം തടാകം. വാറങ്കലിൽനിന്ന് 80 കിലോമീറ്റർ അകലെ, ഭൂപാൽപള്ളി ജില്ലയിലാണ് ലക്നാവരം തടാകം സ്ഥിതിചെയ്യുന്നത്. അതിരാവിലെയാണ് അവിടേക്ക് പുറപ്പെട്ടത്. വഴിയിൽ പലയിടത്തും വാനരക്കൂട്ടങ്ങളെ കാണാം. ഭക്ഷണം വല്ലതും തടയുമോയെന്ന് തിരയുന്നതായിരിക്കാം.

കുറച്ചുദൂരം പിന്നിട്ടപ്പോഴേക്കും റോഡിന്റെ വീതി കുറഞ്ഞുവന്നു. ഒരു വിനോദസഞ്ചാരകേന്ദ്രത്തിന്റെതായ പകിട്ടുകളൊന്നുമില്ല. പൊട്ടിപ്പൊളിഞ്ഞ റോഡുകളിൽ നെല്ലും റാഗിയും ഉണക്കാനിട്ടിരിക്കുന്നു. മുന്നോട്ടുപോകുന്തോറും വീടുകൾ കുറഞ്ഞുവന്നു. ഇരുവശവും ഇടതൂർന്ന വനം, ഏതൊക്കെയോ പക്ഷികളുടെ ശബ്ദം. അധികം വാഹനങ്ങളോ തിരക്കുകളോ കാണാനാകില്ല. ഞങ്ങളുടെ വാഹനം ചെന്നുനിന്നത് ഒരു വലിയ തടാകത്തിനു മുന്നിലാണ്. ചെറിയ കവാടം കടന്നുവേണം തടാകത്തിലേക്ക് പ്രവേശിക്കാൻ.

തൂക്കുപാലത്തിലൂടെയാണ് തടാകത്തിലേക്കിറങ്ങുന്നത്. വിനോദസഞ്ചാരികൾ എത്തിത്തുടങ്ങുന്നതേയുള്ളൂ. വൈകുന്നേരങ്ങളിൽ, പ്രത്യേകിച്ച് സൂര്യാസമയവേളയിലാണ് സഞ്ചാരികൾ കൂടുതലായി ഇവിടേക്കെത്തുന്നത്. മരങ്ങൾക്കിടയിലൂടെ സൂര്യകിരണങ്ങൾ തടാകത്തിൽ പതിക്കുന്ന കാഴ്ച അവിസ്മരണീയമാണെന്ന് അവിടെയുണ്ടായിരുന്ന വാച്ച്മാൻ മുറിഹിന്ദിയിലും ഇംഗ്ലീഷിലും പറഞ്ഞു. മുതലയുള്ളതിനാൽ തടാകത്തിൽ നീന്തുന്നത് അപകടമാണെന്നും വാച്ച്മാൻ മുന്നറിയിപ്പ് നൽകി.