సన్నివేశం నచ్చకుంటే సినిమాలు మానేస్తా - మీనాక్షి చౌదరి

కెరీర్ ప్రారంభంలోనే అవకాశాలు వరుసగా రావటం ఏ హీరోయిన్ కైనా అదృష్టమే. సినిమాల ఎంపికలో జాగ్రత్తగా ఉంటూ, వ్యక్తిగతంగా కొన్ని ప్రమాణాలు పాటిస్తూ టాలీవుడ్తో పాటు ఇతర భాషల్లోనూ దూసుకెళ్తున్న నాయిక మీనాక్షి చౌదరి. తెలుగులో 'ఇచ్చట వాహనములు నిలుపరాదు' చిత్రంతో కెరీర్ మొదలుపెట్టిన ఈ హర్యాణా భామ 'ఖిలాడీ', 'హిట్-2’ తర్వాత మంచి గుర్తింపు సాధించారు.

ఒకట్రెండు చిత్రాల సక్సెస్తోనే వరుసగా అవకాశాలు క్యూ కట్టాయి. ప్రస్తుతం 'గుంటూరు కారం', 'లక్కీ భాస్కర్', 'మట్కా'తో పాటు పలు చిత్రాల్లో బిజీగా ఉన్నారు. చిన్నప్పటి నుంచి ఒక్కో వయసులో ఒక్కో రకమైన లక్ష్యా లను ఎంచుకుంటూ నిరంతరం ముందుకు సాగుతూనే ఉన్నానని తెలిపారు. డాక్టర్గా, మోడల్గా మంచి గుర్తింపు పొందటమేగాక మిస్ ఇండియా పోటీల్లో రన్నరప్ గా నిలవటం వరకు లైఫ్ లో ప్రతి స్టేజ్ని ఎంజాయ్ చేస్తూ గడిపానని ఎంతో ఆత్మ విశ్వాసంతో చెప్పారు. హీరోయిన్ గా కెరీర్లో ఎదగాలంటే అందం మాత్రమే సరిపోదని, నటనలో ప్రావీణ్యం, ఫిట్నెస్ చాలా అవసర మవుతాయని మీనాక్షి వి రించారు. తన తండ్రి ఆర్మీలో పని చేయటం వల్ల ఇంట్లో మంచి క్రమశిక్షణ నేర్పి, చదువుల్లో, హాబీల్లో ఎంతగానో ప్రోత్సహించా రని వివరించారు. జీవితంలో కిందపడిన ప్రతీసారి గుణపాఠాలు నేర్చుకొని ముందుకు వెళ్తే కెరీర్ గ్రాఫ్ ఎల్లప్పుడూ ఎదుగుతూనే ఉంటుందని చెబుతున్న మీనాక్షి చౌదరి ఇంటర్వ్యూ విశేషాలు...

టాలీవుడ్లో చాలా స్పీడ్గా ఎదుగుతున్నారు కదా?

కెరీర్ మొదట్లోనే ఇంత బిజీగా ఉంటానని ఏనాడూ ఊహించలేదు. ఒక ప్లాన్ అనేది లేకుండా, కేవలం ఆశయంతోనే ఈ రంగంలోకి వచ్చిన నాకు ఇంతటి ఆదరణ లభించటం చాలా అదృష్టంగా భావిస్తున్నాను.

కొందరికి సినీ కెరీర్ ప్రారంభంలో కష్టాలు ఎదురవుతుంటాయి. కానీ నేను ఈ కెరీర్లో అడుగు పెట్టక ముందు లైఫ్లో కష్టాలు ఎదుర్కొని, పడి లేచిన కెరటంలా ఇంతవరకు వచ్చాను. ఎవరికైనా లైఫ్ జర్నీ ఇలాగే ఉంటుందేమో.

ప్రస్తుతం ఎన్ని చిత్రాల్లో నటిస్తున్నారు?

తెలుగులో మూడు, తమిళం, మలయాళంలో కూడా షూటింగ్స్ జరుగు తున్నాయి. బహుశా రెండేళ్ల వరకు నా షెడ్యూల్ బిజీ అయిపోతుంది అనుకుంటున్నాను. అలాగని కొత్తగా వచ్చే సినిమాలు చేయనని కాదు. టైమ్ షెడ్యూల్ ప్రకారం ముందుకెళ్తే అన్నింటినీ మేనేజ్ చేయగలము. అందుకే ప్రస్తుతానికి అంది వచ్చిన ప్రతి అవకాశాన్ని వినియోగించుకుంటాను.