இயற்கை நடத்தும் பாடம்?

இப்போது எல்லாம் புயல் குறித்த அறிவிப்பு வந்து விடுகிறது, முன்கூட்டியே விடுமுறை அளிப்பது, தகவல் சொல்வது என்று அரசும் மக்களும் எவ்வளவோ செய்கின்றனர். இருந்தும் இடர்பாடுகளில் சிக்கித் தவிக்கும் நிலை தொடரவே செய்கிறது.

- டாக்டர் அகிலாண்ட பாரதி

இதே போன்ற ஒரு டிசம்பர் மாதத்தில் தான் சுனாமி வந்து தென்னிந்தியா, இலங்கை அனைத்திலும் தீவிர பாதிப்புகளை ஏற்படுத்தியது. அதில் கொத்துக் கொத்தாக மக்கள் மடிந்தார்கள். சில ஊர்களே காணாமல் போயின.

*மேற்படிப்புப் படிக்கையில் எங்கள் கண் மருத்துவமனை வார்டில் பெரியவர் ஒருவர் நீண்ட நாட்களாகத் தங்கியிருந்தார். கண்புரை அறுவை சிகிச்சைக்கென தனியே வந்திருந்தார். இப்போதெல்லாம் கண்புரை அறுவை சிகிச்சைக்காக காலையில் சென்றால் மாலையில் வீடு வந்துவிடலாம். முகாம் மூலமாகச் சென்றால், கூடுதலாக ஒரு நாள் தங்க வேண்டியிருக்கும், அவ்வளவுதான்.

கட்டுப்பாடற்ற சர்க்கரை நோய், கால்களில் புண்கள் இருப்பவர்கள், தொழுநோயாளிகள், நடக்க முடியாத நிலையில் இருப்பவர்கள், கண் அழுத்த நோய், கருவிழியில் புண் போன்ற வேறு சில கண் பிரச்சனைகளுடன் அவதிப்படுபவர்கள் போன்றோரை 'ஹை ரிஸ்க்' நோயாளிகள் என்போம். இவர்களுக்கு அறுவை சிகிச்சைக்கு முன்னான காத்திருப்பு நேரம் அதிகமாக இருக்கும்.

மாதக் கணக்கில் கூட சிலர் அரசு மருத்துவமனை கண் வார்டுகளில் தங்கியிருப்பார்கள். மெல்ல மெல்ல அவர்களின் வாழ்க்கைக் கதைகள் மருத்துவர்களாகிய எங்களின் காதுக்கும் வரும்.

அப்படித்தான் இந்தப் பெரியவரைப் பற்றியும் தெரிய வந்தது. பெரியவருக்கு ஆரம்பத்தில் சர்க்கரை அளவு 500க்கு மேலாக இருந்தது. சர்க்கரை நோய் மருத்துவரிடம் காட்டி இன்சுலின் போட்டு மாத்திரை, மருந்து கொடுத்தோம்.

சர்க்கரை அளவு 200க்குள் இருந்தால் கண் அறுவை சிகிச்சை செய்யலாம். இந்தப் பெரியவருக்கு எவ்வளவு சிகிச்சை கொடுத்தும் சர்க்கரை அளவு குறைவதாக இல்லை.