பெண்கள், சமூகத்தின் பிரதிநிதிகள்

ஜெயந்தியும் சுகந்தியும் சகோதரிகள். பசியில்லை, சாப்பிட முடியவில்லை. எடை குறைகிறது என்ற தொந்தரவுடன் ஜெயந்தி அடிக்கடி என்னிடம் வருவாள்.

- டாக்டர் அகிலாண்ட பாரதி

எப்போது பரிசோதனை செய்தாலும் அவளது உடல்நலம் சரியாகவே இருக்கும்.மனநலத்தில் தான் பிரச்சனை. அவ்வப்போது மாத்திரைகள், மருந்துகள், ஆலோசனையும் கொடுப்போம், சில நாட்களில் 'இப்ப கொஞ்சம் பரவாயில்லை' என்பாள்.

பல ஆண்டுகளாகவே அவர்களது குடும்பம் எனக்கு அறிமுகம் தான். எப்போதும் அவர்களுடைய சித்தி தான் அவர்களை அழைத்து வருவார்.

"என்னோட அக்கா பிள்ளைங்க இவங்க. பக்கத்து வீடு தான். இவங்க அப்பா ரொம்ப கொடுமைக்காரர். கொடுமை தாங்க முடியாமல் இந்த இரண்டு பிள்ளைகளையும் விட்டுட்டு எங்க அக்கா எங்கேயோ போயிட்டா. அவ முகம் கூட இவங்களுக்குத் தெரியாது. நான் தான் இவங்களை வளத்தேன். இப்ப இவங்களையும் இவங்க அப்பா திட்டுறாரு, அடிக்கிறாரு" என்பார்.