தேவ மயக்கம்!

செழினி சைக்கிள் ஸ்டேண்டை நோக்கி வந்தாள். மாணவ மாணவிகள் சிரிப்பும் பேச்சுமாக தங்களின் சைக்கிள்களை எடுத்துக் கொண்டிருந்தனர். வரிசை வரிசையாக நிறுத்தியிருந்த சைக்கிள்களிலிருந்து தன் சைக்கிளை அவளும் உருவினாள். 

- ஆர்.சுமதி

கண்கள் ஸ்டீபனின் சைக்கிளைத் தேடின. அவனுடைய சைக்கிளும் அங்கே இருந்தது.

ஸ்டீபன் இன்னும் செல்லவில்லை என்பது தெரிந்ததும் நெஞ்சுக்குள் பெரிய நிம்மதி வந்ததைப் போலிருந்தது.

'வகுப்பில் உட்கார்ந்து கொண்டு இன்னும் என்ன செய்கிறான்?

முடிக்க வேண்டிய பாடங்களை எழுதிக் கொண்டிருக்கிறானா?' நினைத்துக் கொண்டவள் அருகே தன் சைக்கிளை எடுக்க வந்த மாணவி ஒருத்தியைப் பார்த்து "ஷைலா... ஸ்டீபன் க்ளாஸ்ல என்ன பண்றான்?" என்றாள்.

"அவன் க்ளாஸ்ல இல்லை. கடைசி பீரியட் பீ.டி. இன்னும் க்ரவுன்ட்ல இருக்கான் போலிருக்கு” என்று சொல்லிக் கொண்டே தன் சைக்கிளை நகர்த்திக் கொண்டு போனாள்.

'க்ரவுன்ட்ல இருக்கானா? சரி...வரட்டும்' என அவள் தன் சைக்கிளை எடுக்காமலேயே வந்து மரத்தடியில் அமர்ந்தாள்.