ഇന്ദുലേഖ

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

മലയാളത്തിലെ ലക്ഷണമൊത്ത ആദ്യ നോവൽ എന്ന നിലയിലാണ് ഇന്ദുലേഖ' അറിയപ്പെടുന്നത്. എന്നാൽ വെറും ഒരു നോവലിനപ്പുറം അതിശക്തയായ ഒരു സ്ത്രീ കഥാപാത്രത്തെ ചരിത്രത്തിന് നൽകുക എന്നൊരു മഹത് കർമ്മം കൂടി ആ കൃതി നിർവ്വഹിച്ചു.

ഇന്ദുലേഖ എന്ന നായികാ കഥാപാത്രം വിദ്യാ സമ്പന്നയായ ഒരു യുവതിയായിരുന്നു. മാധവനുമായി ഗാന്ധർവ്വ വിധി പ്രകാരം നേരത്തെ തന്നെ വിവാഹം നിശ്ചയിച്ചിരുന്നു. എന്നാൽ വല്യ ച്ഛനും കുടുംബത്തിലെ കാർന്നോരും കൂടിയായ പഞ്ചുമേനോന്റെ വിരോധത്തിന് മാധവൻ പാത്രമായതാണ് കാര്യങ്ങൾ കുഴപ്പത്തിലാക്കിയത്.

കോപം വളർന്നപ്പോൾ ഇന്ദുലേഖയെ മാധവന് വിവാഹം ചെയ്തു നൽകില്ല എന്ന് കാർന്നോർ ശപഥമെടുത്തു. തുടർന്ന് സൂരിനമ്പൂരിപ്പാടെന്ന വിചിത്ര രൂപിയായ ഒരു ജൻമിയുമായി ഇന്ദുലേഖയ്ക്ക് വിവാഹാലോചന നടത്തുന്നു. ഇക്കാര്യം പറയാൻ വന്ന പഞ്ചുമേനോനും ഇന്ദുലേഖയുമായുള്ള സംഭാഷണം അതീവ രസകരമാണ്. ഇന്ദുലേഖയുടെ സംഭാഷണ ചാതുര്യം ഇങ്ങനെ പലയിടങ്ങളിലും വ്യക്തമാക്കുന്നുണ്ട്. ശേഷം സൂരിനമ്പൂരിപ്പാടുമായുള്ള ഇന്ദുലേഖയുടെ സംഭാഷണവും അതീവ രസകരമാണ്.