മീശക്കാരിയുടെ അഭിമാനം

മീശയുണ്ടേൽ പുരുഷൻ മീശയില്ലേൽ സ്ത്രീ. പുരുഷന്റെ കുത്തകാവകാശങ്ങൾ ഇനിയില്ല. കൗമാരം മുതൽ തന്നിലുണ്ടായിരുന്ന പൊടിമീശയെ നിലനിർത്തി ഇന്നും അത് അഭിമാനമായി കൊണ്ടുനടക്കുന്ന കണ്ണൂർകാരി ഷൈല ഇപ്പോൾ സോഷ്യൽ മീഡിയ താരമാണ്. ലോകോത്തര ചാനൽ ആയ ബി.ബി.സി പോലും മീശക്കാരിയുടെ ഇന്റർവ്യൂ എടുക്കാൻ കേരളത്തിലെത്തി. ചാനൽ ഷോകളിലും സിനിമയിലേക്കുമുള്ള വിളികൾ വരെ തേടിയെത്തിയ മീശക്കാരി ‘മഹിളാരത്നം' വായനക്കാരോട് മനസ്സ് തുറക്കുന്നു.

- പ്രതീഷ് ശേഖർ

ഇപ്പോൾ എങ്ങനെ ഒരു സെലിബ്രിറ്റി ആയോ ?

ഷൈല: അയ്യോ അങ്ങനെയൊന്നുമല്ല. ബി.ബി.സി ഉൾപ്പെടെ പല ചാനലുകളിലും ശ്രദ്ധിക്കപ്പെട്ടു. അത് തീരെ പ്രതീക്ഷിക്കാതെ സംഭവിച്ചതാണ്.

ഒരു സ്ത്രീക്ക് മീശ എന്നുപറയുമ്പോൾ കുടുംബാംഗങ്ങളുടെ സപ്പോർട്ട് എങ്ങനെയായിരുന്നു ?

ആരും ഒന്നും പറയാറില്ല. ഈ പൊടി മീശ വന്നുതുടങ്ങിയപ്പോൾ ദാ പെണ്ണിന് മീശ വരുന്നല്ലോ എന്നുപറഞ്ഞു. അതിനെന്താ വന്നോട്ടെ എന്ന് ഞാനും.

പുരുഷന്മാർ മീശ പിരിച്ചുനടക്കുന്ന കാലം ഉണ്ടായിരുന്നു. മീശക്കാരി എന്ന് അറിയപ്പെടുമ്പോൾ സന്തോഷം തോന്നിയോ ?

ഒരുപാട് സന്തോഷമുണ്ട്. മീശക്കാരി എന്ന ലേബൽ വേറെ എവിടെയും കാണാനാവില്ലല്ലോ. ഇൻസ്റ്റാ, എഫ്.ബി, ടെലിഗ്രാം എന്നിങ്ങനെ എല്ലാ സാമൂഹിക പ്ലാറ്റ്ഫോമുകളിലും "മീശക്കാരിയാണ് നിറഞ്ഞുനിൽക്കുന്നത്. എന്റെ പേര് എവിടെയും കാണാനാവില്ല.

മീശ സ്റ്റൈൽ ആക്കാറുണ്ടോ ?

സ്റ്റൈൽ ആക്കാനൊന്നും പോവാറില്ല. രണ്ടുവശത്തും വളർന്നു വരുമ്പോൾ അതൊന്ന് വെട്ടിക്കുറയ്ക്കും.