ഗിന്നസ് വേൾഡ് റിക്കാർഡ് കരസ്ഥമാക്കിയ പെൺശബ്ദം

 84 മണിക്കൂർ തുടർച്ചയായി റേഡിയോ ബ്രോഡ്കാസ്റ്റിംഗ് നടത്തിയതിന്റെ പേരിലാണ് ഗിന്നസ് വേൾഡ് റിക്കാർഡ് സ്ഥാപിക്കുവാൻ സിന്ധുവിന് കഴിഞ്ഞത്

- ജി. കൃഷ്ണൻ

ദുബായ് മലയാളികൾക്ക് ഈ ശബ്ദം സുപരിചിതമായിരിക്കും. കേരളത്തിൽ തൃശ്ശൂർ ജില്ലയിലെ ചാലക്കുടിയിൽ നിന്നുള്ള സിന്ധു ശബ്ദം. കഴിഞ്ഞ പതിനഞ്ചു വർഷങ്ങളായി യു.എ.ഇയിൽ റേഡിയോ സ്റ്റേഷനിൽ സിന്ധുവുണ്ട്. 2004 ൽ ഇവിടെയെത്തിയ സിന്ധു റേഡിയോ ഏഷ്യാ 94.7 എഫ്.എംൽ ആണ് പ്രവർത്തനം ആരംഭിച്ചത്. അതിനുശേഷം 2007 ലാണ് അറേബ്യൻ റേഡിയോ നെറ്റ് വർക്കിന് കീഴി ലുള്ള ഹിറ്റ് എഫ്.എം.എൽ വാർത്താവിഭാഗത്തിൽ ജോലി തുടങ്ങിയത്. ഇവിടെ മൂന്നുവർഷക്കാലം ന്യൂസ് പ്രിന്ററായി വർക്ക് ചെയ്തതിനു ശേഷമാണ് പ്രോഗ്രാം ഡിപ്പാർട്ടുമെന്റിലേക്ക് മാറുന്നത്. 2020 വരെയും അത് തുടർന്നു.

ശബ്ദ സൗകുമാര്യതയാണോ സിന്ധുവിനെ ഈ പ്രൊഫഷനിലേക്ക് എത്തിച്ചത് ?

 ഏയ്, ശബ്ദസൗകുമാര്യം ഒന്നും ആണെന്ന് തോന്നുന്നില്ല. കോളേജിൽ പഠിക്കുന്ന കാലത്ത് ആൾ ഇന്ത്യാ റേഡിയോയിൽ ബി. ഗ്രേഡ് ആർട്ടി സ്റ്റായി ജോലി ചെയ്തിട്ടുണ്ട്. അന്നത് എന്റെയൊരു സുഹൃത്ത് പറഞ്ഞതിന്റെ ഇൻസ്പിരേഷനിൽ നിന്നുമാണ് അങ്ങനെ ജോലി ചെയ്യാൻ കഴിഞ്ഞത്.

പിന്നെ, ശബ്ദസൗകുമാര്യതയാണോയെന്ന് ചോദിച്ചാൽ, ചില സമയത്ത് നമ്മൾ ചില കാര്യങ്ങളിൽ വന്നുപെടുമ്പോൾ അതിന്റെയൊരു സീരിയസസ്സ് പോലും അറിയാതിരുന്ന സമയത്ത് നമ്മളത്തരം പ്രൊഫഷനിൽ വന്നുപെടും എന്ന് തോന്നിയിട്ടുണ്ട്. എന്റെ കാര്യത്തിൽ അത് ഒരുപരിധിവരെ സത്യമാണ്. കാരണമെന്തെന്ന് ചോദിച്ചാൽ സംസാരത്തിൽ വലിയ അക്ഷരസ്ഫുടതയോ ഭംഗിയോ ഉച്ചാരണശുദ്ധിയോ അതിനെക്കുറിച്ചൊന്നും വ്യക്തമായ ധാരണ പോലുമില്ലാത്ത സമയത്താണ് ഞാൻ ടെലിവിഷനിൽ എത്തിപ്പെടുന്നത്. വളരെ നാടൻ സ്ലാംഗിൽ സംസാരിക്കുന്ന എനിക്ക് കൈരളി ടെലിവിഷനാണ് ഏറ്റവും കൂടുതലായി ഒരു ട്രെയിനിംഗ് തന്നിട്ടുള്ളത്. ഉച്ചാരണത്തെക്കുറിച്ചും മോഡുലേഷനെക്കുറിച്ചും എങ്ങനെയാണ് കാര്യങ്ങൾ വ്യക്തമായി മറ്റുള്ളവരിലേക്ക് അവതരിപ്പിക്കാൻ കഴിയുന്നത് എന്നൊക്കെയുള്ള കാര്യങ്ങളെക്കുറിച്ച് പ്രോപ്പറായ ട്രെയിനിംഗ് എനിക്ക് അവിടെ നിന്നുമാണ് ലഭിച്ചിട്ടുള്ളത്.