ജീവിതം ഒരു പെൻഡുലം

മലയാള സാഹിത്യ- സംഗീത- സിനിമയിലെ അത്ഭുതപ്രതിഭ കവികളുടെ കവി എന്നറിയപ്പെടുന്ന ശ്രീകുമാരൻ തമ്പി ‘മഹിളാരത്നത്തിന് നൽകിയ പ്രത്യേക അഭിമുഖം

- സായിരാജലക്ഷ്മി,

തിരുവനന്തപുരത്ത് വലിയ ഒരു മഴ തോർന്നുനിന്ന നേരത്താണ് മലയാളികളുടെ ഹൃദയസരസ്സിൽ പ്രണയപുഷ്പങ്ങൾ വിടർത്തിയ, കസ്തൂരിഗന്ധമായി ഇപ്പോഴും വീശുന്ന, മലയാള സിനിമയിലെ അത്ഭുത പ്രതിഭയായ നമ്മുടെ സ്വന്തം ശ്രീകുമാരൻ തമ്പി സാറിനെ കാണാനായി അദ്ദേഹത്തിന്റെ "കരിമ്പാലേത്ത് വീട്ടിൽ എത്തിയത്.

ഹൃദയം കൊണ്ടെഴുതിയ അദ്ദേഹത്തിന്റെ ഗാനങ്ങൾ കേൾക്കുന്തോറും നമ്മൾ വീണ്ടും വീണ്ടും ചെറുപ്പമാകുന്നു. സംഗീതത്തിന് മനുഷ്യരേക്കാൾ സൗമ്യതയും, സഹിഷ്ണുതയും ഉണ്ടെന്ന് പറയുന്ന ശ്രീകുമാരൻ തമ്പി, കളരിക്കൽ കൃഷ്ണപിളളയുടേയും, ഭവാനിയമ്മ തങ്കച്ചിയുടേയും അഞ്ച് മക്കളിൽ മൂന്നാമനായി ഹരിപ്പാട് കരിമ്പാലത്ത് ജനിച്ചു. ഏറ്റവും മൂത്ത സഹോദരൻ പി.വി. തമ്പി(പി. വാസു ദേവൻ തമ്പി) പ്രസിദ്ധ എഴുത്തുകാരനായിരുന്നു. കൃഷ്ണപ്പരുന്ത്, ഗരുഡൻ തുടങ്ങിയവ അദ്ദേഹത്തിന്റെ പ്രശസ്തമായ നോവലുകളായിരുന്നു. രണ്ടാമത്തെ മൂത്ത സഹോദരൻ, കേരളത്തിലെ ഡയറക്ടർ ഓഫ് പ്രോസിക്യൂഷനും, ലോകായുക്തയുടെ സ്പെഷ്യൽ അറ്റോർണിയും, കേരള ബാർ കൗൺസിൽ ചെയർമാനായും, പ്രസിഡന്റായും പ്രവർത്തിച്ചിരുന്ന പി.ജി. തമ്പി(പി. ഗോപാലകൃഷ്ണൻ തമ്പി)യാണ്. അനുജത്തി തുളസി ഭായി തങ്കച്ചി, അനുജൻ പ്രസന്നവദനൻ തമ്പി.

"മഹിളാരത്ന'വുമായി വർഷങ്ങളായുള്ള അദ്ദേഹത്തിന്റെ സ്നേഹബന്ധത്തെക്കുറിച്ച് പറഞ്ഞുകൊണ്ടാണ് “മഹിളാരത്നത്തിനു വേണ്ടിയുള്ള ഈ പ്രത്യേക അഭിമുഖം അദ്ദേഹം തുടങ്ങിയത്.

ആദ്യകാലത്തെ മലയാള സിനിമക ളിലെ അഭിനയം ഇന്ന് ഏറെ മാറിയിട്ടുണ്ട്. ഈ വ്യത്യാസത്തെക്കുറിച്ച് പറയാമോ?