വിശ്വാസങ്ങൾ തകർത്ത ജീവിതം

സിനിമകളിലെന്നപോലെ മിനിസ്ക്രീനിലും ശ്രദ്ധേയമായ കഥാപാത്രങ്ങളെ അവതരിപ്പിച്ചു വരുന്നതിനിടയിലാണ് തന്റെ ജീവിതത്തിലെ കറുത്ത അദ്ധ്യായത്തിലൂടെ ശാലുമേനോന് കടന്നുപോകേണ്ടിവന്നത്. തന്റെ ജീവിതാനുഭവങ്ങൾ പങ്കുവയ്ക്കുകയാണ് ശാലു...

- ശരത് സുബ്രഹ്മണ്യം

ഒരുപാട് വിവാദങ്ങളും വിഷമതകളും നിറഞ്ഞ ഒരു വലിയ കാലം താങ്കളുടെ ജീവിതത്തിൽ കഴിഞ്ഞുപോയി. ഇപ്പോൾ താങ്കൾക്ക് ഏറ്റവും ഇഷ്ടപ്പെട്ട കലാമേഖലയിലാണ്, എന്ത് തോന്നുന്നു.

ജീവിതത്തിൽ സന്ദിഗ്ധഘട്ടങ്ങൾ അനവധി തരണം ചെയ്തിട്ടുണ്ട്. എനിക്കേറ്റവും സന്തോഷം നൽകുന്ന ഒരിടമാണ് ഇവിടം. ഞാനിപ്പോൾ ജീവിക്കുന്നത് ഇവിടെയാണ്. കുട്ടികളുമായുള്ള ഇടപെടലും അവരുടെ സ്നേഹവുമെല്ലാം ഒരുപാട് സന്തോഷം നൽകുന്ന കാര്യമാണ്.

ഇപ്പോൾ കലയിൽ ജീവിക്കുന്നു അല്ലേ.

തീർച്ചയായും ഞാൻ ഒരു കലാകുടുംബത്തിൽ ആണ് ജനിച്ചത്. എന്റെ മുത്തച്ഛൻ തൃപ്പൂണിത്തുറ അരവിന്ദാക്ഷൻ, മലയാളത്തിൽ ബാലെ എന്ന കലാരൂപം അവതരിപ്പിക്കുന്നത് എന്റെ മുത്തച്ഛനാണ്. ഒരുപാട് അവാർഡുകൾക്ക് അദ്ദേഹം അർഹനായിട്ടുണ്ട്. മുത്തച്ഛൻ തന്നെയാണ് എന്നെ കലാരംഗത്തേയ്ക്ക് കൊണ്ടുവന്നത്. ഞങ്ങളുടെ നൃത്തവിദ്യാലയം 64 വർഷമായി തുടർന്നുപോകുന്നു. ആയുസ്സുള്ളതുവരെ ഇത് മുന്നോട്ട് കൊണ്ടുപോകണം എന്നാണ് ആഗ്രഹം. ഇപ്പോൾ ആറ് ബ്രാഞ്ചുകളിലായി എണ്ണൂറോളം കുട്ടികൾ നൃത്തം പഠിക്കുന്നുണ്ട്.

? ഒരേസമയം മലയാളികൾ താങ്കളെ ദേവിയായും ലക്ഷ്മിയായും കണ്ടിട്ടുണ്ട്. ഒരു നർത്തകിയെന്ന നിലയിൽ ഇത്തരം വേഷങ്ങൾ ചെയ്യാൻ എത്രത്തോളം എളുപ്പമാണ്.