പ്രമേഹവും വ്യായാമവും

പ്രമേഹം ഇപ്പോൾ ആഗോളതലത്തിൽ, വികസിത രാജ്യങ്ങളിൽ പകർച്ചവ്യാധി പോലെയാണ് ജനങ്ങളെ ബാധിച്ചു കൊണ്ടിരിക്കുന്നത്

- ഡോ. എം.പി. മണി, 'തൂലിക', കരുമ്പുള്ളി, പട്ടാമ്പി-679306 ഫോൺ: 0466-2212752

പ്രമേഹം ഇപ്പോൾ ആഗോളതലത്തിൽ, വികസിത രാജ്യങ്ങളിൽ പകർച്ചവ്യാധി പോലെയാണ് ജനങ്ങളെ ബാധിച്ചു കൊണ്ടിരിക്കുന്നത്. ജീവിതത്തിന്റെ നല്ല പ്രായത്തിലാണ് ഇത് ബാധിക്കുന്നത് എന്നതാണ് ഏറ്റവും ദുഃഖകരം. ഇന്ത്യയിൽ പതിനഞ്ച് കോടിയോളം പേർ പ്രമേഹരോഗികളാണ്. രോഗികളാകാൻ സാധ്യതയുള്ളവരും അത്രതന്നെ കാണും. മധ്യപ്രായത്തിലുള്ള പൊണ്ണത്തടിയന്മാരെയാണ് ഈ രോഗത്തിന് കൂടുതൽ പ്രിയം. ശാരീരികമായി അദ്ധ്വാനിക്കാത്തവരിലും മാനസിക സംഘർഷമുള്ളവരിലും പ്രമേഹം വേഗത്തിൽ പിടിമുറുക്കും. മറ്റ് നിരവധി രോഗങ്ങളും സങ്കീർണ്ണതകളും ക്ഷണിച്ച് വരുത്തുമെന്നതാണ് പ്രമേഹത്തിന്റെ മറ്റൊരു ദുരിതം. നെഞ്ചുവേദന, ഹൃദയാ ഘാതം, പക്ഷാഘാതം, ഗാങ്ഗ്രീൻ എന്നിവ ഉദാഹരണങ്ങളാണ്.

എന്നാൽ നേരത്തെ രോഗനിർണ്ണയം നടത്താൻ കഴിയുക, ചിട്ടപ്പെടുത്തിയ ആഹാരക്രമം ശീലമാക്കുക, പതിവായി വ്യായാമം ചെയ്യുക എന്നീ കാര്യങ്ങളിലൂടെ പ്രമേഹത്തെ പൂർണ്ണമായും നിയന്ത്രണവിധേയമാക്കാവുന്നതാണ്. പ്രമേഹം ബാധിക്കാതിരിക്കാനും ഇതൊക്കെ തന്നെയാണ് പോംവഴി. പ്രമേഹത്തിന്റെ സങ്കീർണ്ണതകളായ അന്ധത, മരവിപ്പ്, ഗാങ്ഗ്രീൻ, വൃക്കയുടെ തകർച്ച, അടിക്കടിയുണ്ടാകുന്ന രോഗാണുസംക്രമണങ്ങൾ, ലൈംഗികശേഷിക്കുറവ് എന്നിവയ്ക്ക് ഇതൊക്കെ തന്നെയാണ് ശരിയായ പരിഹാരമാർഗ്ഗങ്ങൾ.