കേരളത്തിന്റെ ലക്ഷ്മി ജർമ്മനിയുടെ സമീറ

സന്ദർശകയായും ഗവേഷണ വിദ്യാർത്ഥിനിയായും ഫിലിം മെയ്യറായും പല തവണ ഇന്ത്യയിലെത്തിയ സമീറ ഗോത്ത് എന്ന ജർമ്മൻ യുവതി വളരെ യാദൃച്ഛികമായിട്ടാണ് ഫോർട്ട് കൊച്ചി സ്വദേശി ജോർജ് അഗസ്റ്റിനെ കണ്ടുമുട്ടുന്നതും പ്രണയിക്കുന്നതും. ആ ബന്ധം വിവാഹത്തിൽ കലാശിച്ചതോടെ ജർമ്മൻ ഭാഷയ്ക്ക് ലഭിച്ചത് അമൂല്യമായ നിരവധി ആയുർവേദ ഗ്രന്ഥങ്ങളാണ്. ഇന്ത്യയോടും മലയാളിയോടും കൂട്ടുകൂടിയ ആ ജർമ്മൻ യുവതിയുടെ കഥയാണിത്.....

- മൈക്കിൾ വർഗ്ഗീസ് ചെങ്ങാടക്കരി

ജർമ്മനിയിൽ നിന്ന് 38 കൊല്ലം മുൻപ് ഇന്ത്യ സന്ദർശിക്കാനെത്തിയ സമീറ ഗോത്ത് എന്ന വിദേശവനിത കേരളത്തിൽ നിന്ന് മടങ്ങിയത് കൊല്ലം -ആലപ്പുഴ സമ്മാനിച്ച വശ്യമായ ബോട്ടുയാത്ര കാഴ്ചകളുമായാണ്. അഷ്ടമുടി കായലും വേമ്പനാട് കായലും സമീറയെ അത്രയധികം ആകർഷിച്ചിരുന്നു. 1987-ലായിരുന്നു കൊല്ലം ബോട്ടുജെട്ടിയിൽ നിന്ന് ആലപ്പുഴ ബോട്ടുജെട്ടിയിലേക്കുള്ള ത്രില്ലടിപ്പിക്കുന്ന ആ യാത്ര.

പിന്നീടങ്ങോട്ട് സിനിമാക്കഥ പോലെ സ്വപ്നസുന്ദരമായ സംഭവങ്ങളാണ് അരങ്ങേറിയത്. കൃത്യം 10 കൊല്ലം കഴിയുമ്പോൾ താൻ കേരളത്തിന്റെ മരുമകളാകുമെന്നും ലക്ഷ്മിയെന്ന പേര് സ്വീകരിക്കുമെന്നും സമീറ ഗോത്ത് അന്ന് സ്വപ്നത്തിൽ പോലും വിചാരിച്ചതല്ല.

രണ്ടാം ലോകമഹായുദ്ധത്തിനു ശേഷം നാസി കുറ്റവാളികളെ വിചാരണയ്ക്ക് വിധേയമാക്കിയ ജർമ്മനിയിലെ ന്യൂറെംബെർഗ് നഗരമാണ് സമീറയുടെ ജന്മനാട്. ഇന്ത്യയെപ്പറ്റി ദരിദ്രരാഷ്ട്രമെന്ന പൊതുധാരണയാണ് പശ്ചിമ ജർമ്മനിയിൽ നിലനിന്നിരുന്നത്. എന്നാൽ ആദ്യയാത്രയിൽ തന്നെ സമീറയുടെ മനസ്സിനെ ഇന്ത്യ കീഴടക്കിയിരുന്നു.

1991-ൽ സമീറ വീണ്ടും ഇന്ത്യയിലെത്തി. ഇത്തവണ ഗവേഷണ വിദ്യാർത്ഥിനി എന്ന നിലയിലായിരുന്നു സന്ദർശനം. ജർമ്മനിയിലെ പ്രശസ്തമായ ഗവേഷണ സർവ്വകലാശാലയായ ഫ്രീബെർഗ് (ആൽബെർട്ട് ലുഡ് വിക്ക്) യൂണിവേഴ്സിറ്റിയിലെ സോഷ്യൽ ആന്ത്രോപ്പോളജി വിദ്യാർത്ഥിനിയായിരുന്നു സമീറ അന്ന്. പഠനത്തിന്റെ ഭാഗമായി ഇന്ത്യയിലെ സ്ത്രീധന സമ്പ്രദായത്തെപ്പറ്റി തീസിസ് തയ്യാറാക്കാൻ ധാർവാർഡ് യൂണിവേഴ്സിറ്റിയിലാണ് പ്രവേശനം ലഭിച്ചത്. ആ വരവ് ഇന്ത്യയെ കൂടുതൽ അടുത്തറിയാൻ അവസരം ഒരുക്കി. 1991-92 കാലയളവിൽ തീസിസ് പൂർത്തിയാക്കി സമീറ ജർമ്മനിയിലേക്ക് മടങ്ങി. അപ്പോഴേയ്ക്കും ഇന്ത്യയെക്കുറിച്ച് കൂടുതൽ വ്യക്തമായ ധാരണ സമീറയിൽ കരുപ്പിടിച്ചിരുന്നു.

പ്രണയം വിവാഹത്തിലേക്ക്....

ഫെമിനിസ്റ്റായിരുന്ന സമീറ ഗോത്തിന്റെ മനസ്സിൽ പ്രണയം, വിവാഹം, കുടുംബം തുടങ്ങിയ മൃദുല വികാരങ്ങൾക്ക് സ്ഥാനമുണ്ടായിരുന്നില്ല. എന്നിട്ടും വൻകരകൾ താണ്ടി ഈ കൊച്ചു കേരളത്തിലെ ഫോർട്ട് കൊച്ചിക്കാരനായ ജോർജ് അഗസ്റ്റിൻ സമീറയുടെ ഹൃദയം കീഴടക്കി. അതേപ്പറ്റി ചേർത്തല അരൂക്കുറ്റിയിലെ കായലോര അവധിക്കാല വസതിയിലിരുന്ന് “മഹിളാരത്നം പ്രിതിനിധി മൈക്കിൾ വർഗ്ഗീസ് ചെങ്ങാടക്കരിയോട് സമീറ സംസാരിക്കുമ്പോൾ ജോർജ് വർഗീസ് ചെറുപുഞ്ചിരിയോടെ സമീപമുണ്ടായിരുന്നു.