நீட் தேர்வும் உண்மை நிலவரமும்!

நீட் முறைகேடு தொடர்பாக தமிழ்நாடு சட்டப்பேரவையில் முதலமைச்சர் மு.க. ஸ்டாலின் கொண்டு வந்த தனித்தீர்மானம் நிறைவேறியது.

இதற்கு முன்பு நீட் தேர்வை ரத்து செய்யக்கோரி தமிழ்நாடு சட்டப்பேரவையில் தீர்மானம் நிறைவேற்றப்பட்டு இருக்கிறது.

இருந்தாலும் தற்போது நிறைவேற்றப்பட்டுள்ள தீர்மானம் நீட் முறைகேடு தொடர்புடையது என்பது குறிப்பிடத்தக்கது.

2017 ஆம் ஆண்டு நீட் தேர்வை ஒன்றிய அரசு கட்டாயமாக்கியது. நீட் அறிமுகப்படுத்தப்பட்டது முதல் தமிழ்நாடு முழுமையாக எதிர்த்து வருகிறது.

மருத்துவத்துறையிலும், சுகாதார குறியீடுகளிலும் நாட்டிற்கே முன்மாதிரியாக தமிழ்நாடு திகழ்கிறது. முனைவர் அனந்த கிருஷ்ணன் பரிந்துரையின்பேரில், மருத்துவம் உள்ளிட்ட அனைத்து தொழில் படிப்புகளுக்கும் நுழைவுத் தேர்வை ரத்து செய்ய அடித்தளமிட்டவர் கலைஞர் கருணாநிதி.

ஆனால், நீட் தேர்வை ஒன்றிய அரசு கட்டாயமாக்கியபின் மருத்துவப்படிப்பு மாணவர்களுக்கு எட்டாக்கனியாகிவிட்டது.

இந்நிலையில், நீட் தேர்வு குறித்து அண்மைக்காலமாக பல்வேறு குற்றச்சாட்டுகள் எழுந்து வருகின்றன.

மேலும் நீட் தேர்வுக்கு பல்வேறு மாநிலங்களிலும் எதிர்ப்பு கிளம்பி வருகிறது.

அண்மையில் நடைபெற்ற நீட் தேர்வில் அரங்கேறிய சம்பவங்கள் மாணவர்களின் நம்பிக்கையை நிலைகுலையச் செய்துள்ளன.

நீட் தேர்வு முறைகேடு:

இந்தியாவில் மருத்துவம், பல் மருத்துவம் (எம்.பி.பி.எஸ்., பி.டி.எஸ்.) போன்ற இளநிலை மருத்துவப் படிப்புகளில் சேருவதற்கு நீட் (NEET - National Entrance Eliglibilty Entrance Exam) எனப்படும் நுழைவுத் தேர்வு ஆண்டு தோறும் நடத்தப்படுகிறது.

தேசிய தேர்வு முகமை நடத்தும் இந்தத் தேர்வு கடந்த மே 5 அன்று நடைபெற்றது. தமிழ்நாட்டில் சுமார் 1.50 லட்சம் மாணவ, மாணவியர் உட்பட நாடு முழுவதும் 24 லட்சம் பேர் இந்தத் தேர்வை எழுதினர். அந்த வகையில் தமிழ் உட்பட 13 மொழிகளில் 557 நகரங்களில் இளநிலை மருத்துவப் படிப்புகளுக்கான நீட் தேர்வு நடைபெற்றது.

இந்நிலையில் மக்களவை தேர்தல் முடிவுகள் வெளியான ஜூன் 4 அன்று நீட் தேர்வு முடிவுகளும் வெளியிடப்பட்டன.

இத்தகைய சூழலில்தான் மும்பையில் நடைபெற்ற நீட் தேர்வில் ஆள்மாறாட்டம் செய்த ராஜஸ்தானைச் சேர்ந்த 20 வயது மாணவர் மீது மும்பை காவல் துறையினர் வழக்குப்பதிவு செய்திருந்தனர்.