ഇതെല്ലാം ശരിയാണോ?

സൗന്ദര്യം വർധിപ്പിക്കുമെന്ന് പറഞ്ഞു കേൾക്കുന്നതെന്തും പരീക്ഷിച്ചു നോക്കും മുൻപ് അറിയൂ ചില കാര്യങ്ങൾ

- അമ്മു ജൊവാസ്

മുടി വളരാൻ "മിഠായി', ചുളിവു മാറാൻ മസാജിങ്, നിറം കൂടാൻ ഐസ് ക്യൂബ് . സൗന്ദര്യപ്രശ്നങ്ങൾ ഇല്ലാത്തവരെ പോലും ആശയക്കുഴപ്പത്തിലാക്കുന്ന ഓരോ പൊടിക്കൈകളാണ് ദിവസം തോറും സോഷ്യൽ മീഡിയ വഴി ഷെയർ ചെയ്തെത്തുന്നത്. ഓരോന്നും പരീക്ഷിച്ചും നിരീക്ഷിച്ചും സമയവും സൗന്ദര്യവും കളയാൻ പലർക്കും മടിയില്ല.

മുഖത്തും മുടിയിലും ഓരോ പുതിയ കാര്യവും പരീക്ഷിക്കും  മുൻപ് ഒന്നോർക്കുക, അവ പൊള്ളലോ പാടോ ഉണ്ടാക്കാം. അലർജിയും അസ്വസ്ഥതയും സമ്മാനിക്കാനിടയുണ്ട്. സൗന്ദര്യ പരിചരണത്തിൽ മിക്കവരും വരുത്തുന്ന 10 അബദ്ധങ്ങളും അവയുടെ പരിഹാരവും അറിഞ്ഞോളൂ.

മുഖത്ത് ആവി പിടിക്കാമോ ?

ചർമസുഷിരങ്ങൾ തുറക്കാനും മുഖത്ത് അടിഞ്ഞുകൂടിയ അഴുക്ക് നീക്കാനും അമിത എണ്ണമയം അകറ്റാനുമെല്ലാം ആവി പിടിക്കുന്നത് നല്ലതാണ്. ബ്ലാക് ഹെഡ്സും വൈറ്റ് ഹെഡ്സും നീക്കുന്നതിനും ആവി പിടിക്കാം. രക്തയോട്ടം വർധിപ്പിച്ച് മുഖത്തിന് തിളക്കം നൽകാനും ഇതിലൂടെ കഴിയും. എങ്കിലും ശ്രദ്ധിച്ചേ ചെയ്യാവൂ.

സെൻസിറ്റീവ് ചർമമുള്ളവരും, ആവി തട്ടിയാൽ പെട്ടെന്ന് മുഖം ചുവക്കുന്നവരും ആവി പിടിക്കരുത്. അല്ലാത്തവർ ആഴ്ചയിലൊരിക്കൽ ഇളം ചൂടിൽ ആവി പിടിച്ച് മുഖം വൃത്തിയാക്കുന്നതിൽ തെറ്റില്ല. മൂന്നു മിനിറ്റിൽ അധികം മുഖത്ത് ആവി കൊള്ളുകയുമരുത്.

സോപ്പ് ചർമത്തിന് ദോഷമാണോ ?

സോപ്പ് ഉപയോഗമല്ല, അമിത ഉപയോഗമാണ് പ്രശ്നം. ദിവസം രണ്ടിലേറെ തവണ ചർമത്തിൽ സോപ്പ് ഉപയോഗിക്കരുത്. അമിതമായ സോപ്പ് ഉപയോഗം ചർമത്തിലെ സ്വാഭാവിക എണ്ണമയം അകറ്റും, ചർമത്തിന്റെ പിഎച്ച് ബാലൻസ് അസ്വസ്ഥമാക്കി വരൾച്ചയ്ക്കും കാരണമാ കും. അതുകൊണ്ട് സോപ്പ് തേച്ചു കുളിച്ചശേഷം ചർമത്തിൽ ഈർപ്പമുള്ളപ്പോൾ തന്നെ മോയിസ്ചറൈസർ പുരട്ടണം. സിറഡ്, ഹയലുറുണിക് ആസിഡ്, വൈറ്റമിൻ ഇ, കൊക്കോ ബട്ടർ, ഷിയ ബട്ടർ എന്നിവയടങ്ങിയ മോയിസ്ചറൈസർ ഉപയോഗിക്കാം.

കൈകൾ ഇടയ്ക്കിടെ കഴുകേണ്ടി വരുമ്പോൾ സോപിനു പകരം വീര്യം കുറഞ്ഞ ഹാൻഡ് വാഷ് തിരഞ്ഞടുക്കാം. മുഖം കഴുകാൻ ചർമത്തിന്റെ സ്വഭാവത്തിനു യോജിക്കുന്ന, ചർമപ്രശ്നങ്ങൾക്കു പരിഹാരമേകുന്ന ഫെയ്സ് വാഷ് ആണ് നല്ലത്.

മുഖം മസാജ് ചെയ്യണോ ?