പ്രണയമെത്തുന്ന നേരത്തു

ഇവിടെയിതാ, പ്രിയപ്പെട്ട പ്രണയാനുഭവങ്ങൾ പങ്കുവയ്ക്കുന്നു മലയാളത്തിന്റെ നാലു പ്രതിഭകൾ

- തയാറാക്കിയത്. വി.ജി. നകുൽ വര: ജയൻ

ഹൃദയത്തിൽ ഒരു പൂവ് വിരിയും പോലെയാണത്, അത്രമേൽ നേർത്ത, മനോഹരമായ അനുഭവം - പ്രണയം! ‘ഭൂമിക്കടിയിൽ വേരുകൾ കൊണ്ടു കെട്ടിപ്പിടിക്കുന്നു, ഇലകൾ തമ്മിൽ തൊടുമെന്നു പേടിച്ചു നാം അകറ്റിനട്ട മരങ്ങൾ' എന്നു വീരാൻകുട്ടി കവിതയിലെഴുതിയതു പോലെ, അകറ്റിയാലും അകലാതെ, അടുപ്പത്തിന്റെ പുതിയ വഴികൾ തേടുമത്.

മഴയായും മഞ്ഞായും കാറ്റായും പ്രകൃതി നമുക്കു പകരുന്നതും അതു തന്നെ ഹൃദയമർപ്പിക്കുന്ന എന്തിലും വിരിയുന്ന മോഹനരാഗം. രുചിയും കാഴ്ചയും കഥയും ഗാനവുമായി അതു മനസ്സുകളിലേക്കു പടരുന്നു. ഇവിടെയിതാ, തങ്ങൾക്കു പ്രിയപ്പെട്ട പ്രണയാനുഭവങ്ങൾ പങ്കുവയ്ക്കുന്നു മലയാളത്തിന്റെ നാലു പ്രതിഭകൾ. പ്രണയരംഗവുമായി സംവിധായകൻ ലാൽ ജോസ്, പ്രണയരുചിയുമായി നടി ആനി, പ്രണയകഥയുമായി കഥാകൃത്ത് കെ.രേഖ, പ്രണയ ഗാനവുമായി കവി അൻവർ അലി വരൂ, നമുക്കു വാക്കിന്റെ മലഞ്ചെരുവുകളിൽ പ്രണയം പൂത്ത നിമിഷങ്ങളിലേക്കു പോകാം...

ഇന്നലെയിൽ നിന്നൊരാൾ

ലാൽ ജോസ് (സംവിധായകൻ)

കാണാതായ ഭാര്യ ഗൗരിയെ തേടിയാണ് ഡോ.നരേന്ദ്രൻ തമ്പുരാൻ കുന്നിലെത്തുന്നത്. എന്നാൽ, അപകടത്തെത്തുടർന്ന് ഓർമ നഷ്ടമായ അവൾ അയാളെ തിരിച്ചറിയുന്നില്ല. മാത്രമല്ല, ശരത് മേനോൻ എന്ന ചെറുപ്പക്കാരനുമായി പ്രണയത്തിലുമാണ്. ആ സത്യം തിരിച്ചറിഞ്ഞ്, നീറുന്ന മനസ്സോടെ കുന്നിറങ്ങിപ്പോകുന്ന നരേന്ദ്രൻ.

“ഇന്നലെ' സിനിമയുടെ ക്ലൈമാക്സ് രംഗം സംവിധായകൻ ലാൽ ജോസിന്റെ ഹൃദയത്തിലൊരു നോവായി ഇപ്പോഴുമുണ്ട്, ആദ്യം കണ്ട നിമിഷം മുതൽ...

"പ്രണയത്തിന്റെ ഏറ്റവും തീവ്രമായ തലം വിട്ടുകൊടുക്കലാണെന്നും വിരഹത്തിലാണതിന്റെ നിറവെന്നും മലയാളികൾ കണ്ടറിഞ്ഞ നിമിഷം. അതായിരുന്നു ഇന്നലെ'യുടെ ക്ലൈമാക്സ് എന്റെ ഏറ്റവും പ്രിയപ്പെട്ട പ്രണയരംഗവും അതാണ്. ഗൗരി തന്നെ തിരിച്ചറിയുന്നില്ലെന്നു മനസ്സിലാക്കി, അവളെ ശരത്തിനു വിട്ടു കൊടുത്ത്, നരേന്ദ്രൻ കാറിൽക്കയറിപ്പോകുന്ന നിമിഷം. ആ തീവ്രത മറ്റൊരു സിനിമയിലും അനുഭവിക്കുവാനായിട്ടില്ല' ലാൽ ജോസ് പറയുന്നു.

"ഒരു പി. പത്മരാജൻ മാജിക് - അതാണ് ഇന്നലെ തമിഴ് എഴുത്തുകാരി വാസന്തിയുടെ പിറവി' എന്ന കഥയിൽ നിന്നാണു പത്മരാജൻ "ഇന്നലെ ഒരുക്കിയത്. ഡോ. നരേന്ദ്രനായി സുരേഷ് ഗോപിയും ഗൗരിയും മായയുമായി ശോഭനയും ശരത് മേനോനായി ജയറാമും നിറഞ്ഞാടിയ മനോഹരമായൊരു ത്രികോണ പ്രണയകഥ. വറ്റാത്ത അനുരാഗത്തിന്റെ വിവിധ തലങ്ങളിലെ മൂന്നു മനുഷ്യർ.