ഇനി കേൾക്കില്ലല്ലോ ആ സ്നേഹവിളി

"അളവറ്റതായിരുന്നു. ആ സ്നേഹവും സ്നേഹവായ്പും... അന്തരിച്ച വനിത മുൻ എഡിറ്റർ ഇൻ ചാർജ് മണർകാട് മാത്യുവിനെക്കുറിച്ചുള്ള സ്മരണകളിൽ സി.വി.ബാലകൃഷ്ണൻ

- സി.വി.ബാലകൃഷ്ണൻ

പല പത്രാധിപന്മാരുമായും ഇടപഴകാനിടയായിട്ടുണ്ട്. ഓർത്തു നോക്കുമ്പോൾ ഏറെ പ്രിയം തോന്നിയിട്ടുള്ളത് മണർകാട് മാത്യു സാറിനോടാണ്. അദ്ദേഹം നാലു പതിറ്റാണ്ടിലധികം കാലം കാട്ടിയ സ്നേഹവായ്പും സൗഹൃദവും അളവറ്റതായിരുന്നു. പലപ്പോഴും അദ്ദേഹത്തിൽ നിന്നു ഞാനറിഞ്ഞതു പിതൃനിർവിശേഷമായ വാത്സല്യമാണ്.

എന്നെ ബാലനെന്നേ വിളിച്ചിരുന്നുള്ളൂ. സ്വന്തം കൈപ്പടയിൽ ഓരോ കത്തിന്റെയും തുടക്കത്തിൽ കുറിക്കും, പ്രിയപ്പെട്ട ബാലന്...

എൺപതുകളുടെ ആദ്യം തൊട്ടുള്ള ബന്ധമാണ്. കത്തിടപാടുകളുടെ കാലം. ഫോൺ കണക്ഷൻ കിട്ടിയതു പിന്നീടാണ്. മാത്യുസാറിന്റെ ശ്രദ്ധ എന്റെ മേൽ പതിഞ്ഞതു മാതൃഭൂമി ആഴ്ചപ്പതിപ്പിൽ ആയുസ്സിന്റെ പുസ്തകം' എന്ന നോവൽ തുടർച്ചയായി വന്നതോടെയാണ്. ആദ്യ കത്ത് അതുമായി ബന്ധപ്പെട്ടതായിരുന്നു. നോവൽ അത്യധികം ഇഷ്ടമായെന്നറിയിച്ചു കൊണ്ട്. താൻ ചുമതല വഹിക്കുന്ന മലയാള മനോരമ വാർഷിക പതിപ്പിൽ എഴുതാനുള്ള ക്ഷണവും അതിലടങ്ങിയിരുന്നു. ഞാൻ മനോരമ വാർഷികപ്പതിപ്പുകളിലെ പതിവ് എഴുത്തുകാരനാകുന്നത് അതോടെയാണ്. ലബ്ധപ്രതിഷ്ഠരായ എഴുത്തുകാരുടെ നിരയിൽ അന്നൊരു യുവാവായിരുന്ന എന്നെയും മാത്യു സാർ നിർത്തി, മുന്തിയ പരിഗണനയോടെ.

വാർഷികപ്പതിപ്പിനുവേണ്ടി തയാറാക്കിയ രചനകളിൽ അനുവാചക പ്രീതി ഏറ്റവും കൈവരിച്ചത് "കാമമോഹിതം' എന്ന നോവലാണ്. ഇത്തവണ വ്യത്യസ്തമായ ഒരു നോവൽ വേണം എന്നു മാത്യു സാർ പറഞ്ഞു. കോട്ടയത്തു നിന്നുള്ള മടക്ക യാത്രയിൽ തീവണ്ടിയിലിരിക്കെയാണ് ഒരാശയം മനസ്സിൽ തെളിഞ്ഞത്. എഴുതാൻ ഒരാഴ്ച പോലും വേണ്ടി വന്നില്ല.