യുഎസ് ആർമി കഴിക്കുന്ന കേരള കറി

മൂന്നു ലക്ഷം ഡോളർ ലോൺ ഉള്ളപ്പോഴാണ് റോളോയ്ക്കും ആൻ വർക്കിക്കും ജോലി നഷ്ടമായത്. പക്ഷേ തളർന്നിരിക്കാതെ അമേരിക്കയിൽ കേരള കറിയുമായി അവർ ഇറങ്ങി...

- വിജീഷ് ഗോപിനാഥ്

ജീവിതത്തിന്റെ ഫുട്ബോൾ ഗ്രൗണ്ടിലാണു കളി. അടൂർ ചുണ്ടോട്ട് ആൻവർക്കി എന്ന ജിജിയും ഭർത്താവ് തിരുവല്ല തട്ടു കുന്നേൽ റോളോ വർക്കിയും ഒരു ടീമിൽ. എതിർടീമിൽ പ്രതിസന്ധികളുടെ വൻപട. പൊരിഞ്ഞ പോരാട്ടമാണു നടന്നത്. മുട്ട് കൊണ്ട് മുഖത്തടിച്ച് വീഴ്ത്തുന്ന, നെഞ്ചിൻ കൂടിൽ ചവിട്ടി വീഴ്ത്തുന്ന ഫുട്ബോൾ കുതന്ത്രങ്ങളെല്ലാമെടുത്ത് വിധി കളിച്ചു നോക്കി. പക്ഷേ, ആനും റോളോയും പിടിച്ചുനിന്നു. ഇടയ്ക്കിടയ്ക്ക് വന്ന പെനൽറ്റികളിൽ ചോർന്നു പോവാതെ, പ്രായത്തിന്റെ ക്രോസ്ബാറിൽ തട്ടിത്തെറിക്കാതെ കിട്ടുന്ന അവസരമെല്ലാമെടുത്ത് വിജയഗോളുകൾ അടിച്ചു കൊണ്ടിരിക്കുന്നു.

ഈ ജീവിതപ്പന്തുകളി നടന്നത് അമേരിക്കയിലാണ്. എൺപതുകളിൽ ജോലി തേടി നോർത്ത് കാരോലൈനയിലെത്തിയ റോളോയും ആനും ജീവിതത്തിൽ നേരിട്ട ട്വിസ്റ്റുകൾ സിനിമയെ തോൽപ്പിക്കുന്നവ.

അമേരിക്കയിലെ ഏറ്റവും വലിയ ടെലികോം കമ്പനികളിലൊന്നിൽ എൻജിനീയറിങ് വിഭാഗത്തിലായിരുന്നു റോളോ. അതേ സ്ഥാപനത്തിൽ അക്കൗണ്ട്സ് വിഭാഗത്തിൽ ആനും മൾട്ടി മില്യൻ ഡോളർ ആസ്തിയുള്ള കമ്പനി വളരെ പെട്ടെന്ന് പാപ്പരായി. രണ്ടു പേർക്കും ജോലി നഷ്ടമായി. അപ്പോൾ റോളോയ്ക്ക് അൻപത്തിമൂന്നു വയസ്സ്.

ആ പ്രായത്തിൽ, അപ്പോൾ കിട്ടിക്കൊണ്ടിരുന്ന ശമ്പളത്തിൽ മറ്റൊരു ജോലി സാധ്യതയില്ല. രണ്ടു മക്കൾ പഠിക്കുന്നു. തിരിച്ചടയ്ക്കാനുള്ള വീട്ടുലോൺ മാത്രം മൂന്നു ലക്ഷം ഡോളർ. അസുഖം വന്നാൽ ആശുപത്രി ചെലവിനായി ഇൻഷുറൻസ് പോലുമില്ല. 90 മിനിറ്റുള്ള ഫുട്ബോളിലെ ഇൻജുറി ടൈം പോലെ നിർണായകമായ നിമിഷങ്ങൾ...

വലിയൊരു പൊട്ടിച്ചിരിയോടെ ആൻ വർക്കി പറഞ്ഞു, “ബിസിനസ് എന്നാൽ ടീം വർക്കാണ്. ഞാനും റോളോയും ഒരൊറ്റ മനസ്സോടെ പൊരുതി. "കേരള കറി എന്ന പേരിൽ ഫൂഡ് ബിസിനസ്തുടങ്ങി. സത്യത്തിൽ അതല്ലാതെ മുന്നിൽ മറ്റു വഴികളില്ലായിരുന്നു. പോരാട്ടം, പ്രതിസന്ധികളെ മറികടന്ന് ഞങ്ങൾ ഒറ്റ മനസ്സോടെ നടത്തിയ പോരാട്ടം. അതുകൊണ്ടാണ് ഇപ്പോൾ നിങ്ങൾക്ക് മുന്നിലിരുന്ന് സംസാരിക്കാൻ പറ്റുന്നത്.

കളിക്കളത്തിൽ നിന്ന് യുഎസിലേക്ക്