വേൾഡ് ക്ലാസ്

650 കിലോമീറ്റർ റേഞ്ചുമായി ബിവൈഡിയുടെ പ്രീമിയം ഇലക്ട്രിക് കാർ-സീൽ

- നോബിൾ എം. മാത്യു

ലോഞ്ചുചെയ്ത മൂന്നു മാസത്തിനുള്ളിൽ 1000 ബുക്കിങ് അതും 50 ലക്ഷം രൂപ വിലയുള്ള ഇലക്ട്രിക് കാറിന്. ചൈനീസ് ഇലക്ട്രിക് വാഹന ഭീമൻമാരായ ബിവൈഡിയുടെ (ബിൽഡ് യുവർ ഡ്രീംസ്) സീൽ എന്ന ലക്ഷ്വറി ഇലക്ട്രിക് സെഡാന് ഇന്ത്യയിൽ ലഭിച്ച വരവേൽപ്പാണിത്. കേരളത്തിൽ മാത്രം 82 ബുക്കിങ്ങ്! ബിവൈഡിയുടെ മൂന്നാമത്തെ വാഹനമാണ് സീൽ. ബിവൈഡി ചൈനയല്ലേ എന്നു പറഞ്ഞ് പുച്ഛിച്ചിരുന്നവരെ അമ്പരപ്പിക്കുന്ന നിർമാണമികവുമായാണ് സീലിന്റെ മാസ് എൻട്രി. യൂറോപ്യൻ കാറുകളോടു കിടപിടിക്കുന്ന ഒരുപക്ഷേ, അതിനും മുകളിൽ നിൽക്കുന്ന ഡിസൈനും പെർഫോമൻസും സുരക്ഷയുമൊക്കെയായാണ് വരവ്. കൊച്ചി നഗരത്തിരക്കിലും ഹൈവേയിലും ഓടിച്ചറിഞ്ഞ വിശേഷങ്ങൾ.

മാരക ഡിസൈൻ

സ്പോർട്സ് കാറുകൾക്കു നിരത്തിൽ കിട്ടുന്ന താരപരിവേഷം തന്നെയാണ് സീലിനും കിട്ടുന്നത്. വൈറ്റില ഷോറൂമിൽ നിന്നു ബോൾ ഗാട്ടി പാലസിലേക്കുള്ള ഇത്രയും സൈലന്റായ സ്പോർട് ഡ്രൈവിൽ കാർ ഇതേതെന്ന ചോദ്യമായിരുന്നു മിക്കവരുടെയും മുഖത്തു കണ്ടത്.

പതിഞ്ഞുകിടക്കുന്ന 4.8 മീറ്റർ നീളമുള്ള നോച്ച് ബാക്ക്സ്റ്റൈ ൽ ഡിസൈനാണ് സീലിന്റെ ഹൈലൈറ്റ്. ഒഴുക്കുള്ള ക്ലീൻ ഡിസൈനാണ് ബോഡിക്ക്. ബി വൈഡിയുടെ ഓഷ്യൻ തീമിലുള്ള രണ്ടാമത്തെ വാഹനമാണ് ഇത്. കട്ടുകളും ക്രീസുകളും ഒഴിവാക്കി എന്നാൽ മസ്കുലർ ലൈനുകളും എടുപ്പുകളുമുള്ള ഡിസൈൻ. ക്യാരക്ടർ ലൈനുകളുള്ള ബംപ് റിലേക്ക് ലയിച്ചുചേരുന്ന വലിയ ബോണറ്റ്, സ്ലീക്ക് ഹെഡ്ലാംപ്, പോപ് അപ് ഡോർ ഹാൻഡിൽ, റേസ് കാറുകളുടേതുപോലുള്ള പിൻവശത്തെ ഡിഫ്യൂസർ, പെറ്റൽ ആകൃതിയിലുള്ള 19 ഇഞ്ച് എയ്റോ വീൽ, കണക്റ്റഡ് ടെയിൽ ലാംപ് എന്നിങ്ങനെ ഡിസൈനിലെ മികവ് വേറിട്ടുനിൽക്കുന്നു. ബിവൈഡി ലോഗോ ഇല്ലെങ്കിൽ ഒറ്റനോട്ടത്തി ലും രണ്ടു നോട്ടത്തിലും ഇതൊരു ചൈനീസ് കാറാണെന്നു പറയില്ല. അത്ര മികച്ചതാണ് രൂപകൽപനയും നിർമാണ മികവും.

ലക്ഷ്വറി ഇന്റീരിയർ