നിരത്തും മനസ്സും കീഴടക്കിയവർ.

ഇന്ത്യൻ നിരത്തിലെ സൂപ്പർ താരങ്ങളാ യിരുന്ന ടൂവീലർ മോഡലുകളെ വീണ്ടുമൊന്നു കണ്ടുവരാം...

- എൽദോ മാത്യു തോമസ്

ഇന്ത്യൻ ഇരുചക്രവാഹന വിപണി ഇന്നും ഒരു സ്വർണഖനിയാണ്. ദിനംപ്രതി പുതിയ മോഡലുകൾ വിപണിയിലെത്തിയാലും സ്ഥിരമായ വിൽപനയുള്ള വാഹനങ്ങളുടെ വിപണനം ഉഷാറായി നടന്നുകൊണ്ടിരിക്കും. അതുകൊണ്ടുതന്നെയാ ണ് ലോകത്തിലെ തന്നെ ഏറ്റവും വലിയ ഇരുചക്ര വാഹന വിപണിയായി ഇന്ത്യ മുന്നോട്ടു കുതിക്കുന്നത്. 1955ലാണ് ഇന്ത്യയിലെ ഇരുചക്ര വിപണിയുടെ തുടക്കമെന്നു പറയാം. മോപ്പഡുകൾ, സ്കൂട്ടറുകൾ, മോട്ടർസൈക്കിളുകൾ എന്നിങ്ങനെ 3 വിഭാഗങ്ങളായി ഇന്ത്യയിലെ ഇരുചക്ര വാഹന വിപണി തരംതിരിക്കപ്പെട്ടു. റോയൽ എൻഫീൽഡ് ബുള്ളറ്റിൽ നിന്ന് ജൈത്രയാത്ര ആരംഭിച്ച നമ്മുടെ ഇരുചക്രവാഹന വിപണി ഇന്നും അതിശക്തമായി തുടരുകയാണ്. 4 സ്ട്രോക്ക് യുഗം ആരംഭിക്കുന്നതു വരെ ഇന്ത്യയിൽ ഇരുചക്ര വാഹനങ്ങൾക്ക് വലിയ സ്വീകാര്യത നേടാൻ ഭാഗഭാക്കായ ഇരുചക്ര വാഹന വിപണിയുടെ ചരിത്രത്തിലെ പ്രധാന കഥാപാത്രങ്ങളെ ഒന്ന് അനുസ്മരിക്കാം.

റോയൽ എൻഫീൽഡ് ബുള്ളറ്റ്

പൗരുഷത്തിന്റെ അടിസ്ഥാന രൂപം. അതെ, റോയൽ എൻഫീൽഡ് 350 സിസി ബൈക്കിൽനിന്നാണ് ഇന്ത്യൻ ഇരുചക വാഹനലോകം ഉരുണ്ടുതുടങ്ങിയതെന്ന് നിസ്സംശയം പറയാം. 1890കളുടെ അവസാനത്തിൽ എൻഫീൽഡ് സൈക്കിൾ കമ്പനി നിർമിച്ചു തുടങ്ങിയ മോട്ടർ സൈക്കിളിൽ നി ന്ന് 1901ലാണ് റെഡിച്ച് ആസ്ഥാനമാക്കിയ റോയൽ എൻഫീൽഡ് പ്രവർത്തനം ആരംഭിക്കുന്നത്. തുടക്കകാലത്ത് കരുത്തു കുറഞ്ഞ ചെറിയ മോട്ടർസൈക്കിളുകൾ നിർമിച്ച് ഞെട്ടിച്ച ഇവർ ലോകമഹായുദ്ധ ത്തിലെ പങ്കാളിത്തത്തോടെ ലോകശ്രദ്ധ ആകർഷിച്ചു. 1955ൽ ഇന്ത്യയിലെ മദ്രാസ് മോട്ടർ കമ്പനി റോയൽ എൻഫീൽഡുമാ യി ധാരണയിലെത്തിയതോടെയാണ് 350 സിസി കരുത്തുള്ള മോഡലുകൾ ഇന്ത്യയിൽ അസംബിൾ ചെയ്യപ്പെട്ടു തുടങ്ങിയത്. അവിടെ നിന്നും ഇന്ത്യൻ ഹൈവേയിലേക്ക് പാഞ്ഞുതുടങ്ങിയ റോയൽ എൻഫീൽഡ് ബുള്ളറ്റ് ഓരോ വർഷവും പ്രശസ്തി നേടിക്കൊണ്ടേയിരുന്നു.

കാഴ്ചയിൽ ഇന്നു കാണുന്ന ബുള്ളറ്റിൽ നിന്ന് പ്രഥമദൃഷ്ട്യാ വലിയ മാറ്റങ്ങൾ ഇല്ല എന്നതാണ് ബുള്ളറ്റ് എന്ന മോഡലിന് ഇന്നും ജനമനസ്സിൽ പ്രതിഷ്ഠ നേടാൻ കാരണമാകുന്നത്. ഇടതുവശത്ത് ബ്രേക്ക്, വലതുഭാഗത്ത് ഗിയർ, ആംപിയർ കൃത്യമാ ക്കിയുള്ള സ്റ്റാർട്ടിങ് തുടങ്ങി ഏറെ സവിശേഷതകളുള്ള ആ വാഹനത്തിന് ഇന്നും ആരാധകരേറെയാണ്. ബുള്ളറ്റ് എന്ന ഒറ്റ മോഡലിൽനിന്ന് വിൽപന ആരംഭിച്ച് ഇന്നു പത്തോളം മോഡലുകളുമായി ഇന്ത്യൻ വിപണിയുടെ മുന്നിൽ തന്നെയുണ്ട് റോയൽ എൻഫീൽഡ്.

- ഐഡിയൽ ജാവ യെസ്ഡി റോഡ്കിങ്