అదుపులో ఉంటే ఆనందమే.!

కొత్త ఏడాది వచ్చిన ప్రతి సారి చాలా మంది ఏదో ఒక సరికొత్త నిర్ణయం తీసుకుంటారు.

కొత్త ఏడాది వచ్చిన ప్రతి సారి చాలా మంది ఏదో ఒక సరికొత్త నిర్ణయం తీసుకుంటారు. దానిని ఎందరు అమలు చేస్తారు ఎందరు అమలు చేయరు అనే విషయం పక్కన పెడితే, మన ఆరోగ్య దృష్టా అందరూ అలవరుచుకోవాల్సిన కొన్ని మంచి అలవాట్లను తెలుసుకుందాం..

'జీవితం సఫలం' అని మనం అనుకున్నది సాధించిననాడు భావిస్తాం.ఆరోగ్యంగా, ఆనందంగా ఉండాలని ప్రతి ఒక్కరం కోరుకుంటాం. దానికి మనం వేసే ప్రతి అడుగు తరచి చూసుకోవాల్సిన పనిలేదు. మన జీవన విధానంలో కొన్ని నియమాలు పాటిస్తే చాలు. అందుకు పట్టుదల కావాలి.గమ్యానికి చేరాలంటే ఎన్నో అడ్డంకులను అధిగమించాలి. అందుకు ప్రారంభంలో తప్పటడుగులు పడకుండా గాడిలో పెట్టాలి. మానవ జీవితం ఆనందకరం కావాలంటే కొన్ని కూడికలు, తీసివేతలు చేయాలి.తగిలించుకోవాల్సినవి ఉంటాయి. వదిలించుకోవల్సినవీ ఉంటాయి. ప్రతీ ఒక్కరూ వ్యక్తిగతంగా ఎవరికి వారు తమ ఆలోచనలు అంచనాలు నిర్ణయించుకోవాలి. అప్పుడే జీవన గమ్యాన్ని చేరగలరు.

అలాగే ఒక చిన్న ప్రారంభంలోనే వడివడి అడుగులు పడతాయి.ముందుగా ఆరోగ్యం బాగుండాలంటే ఆహారం తాజాగా తీసుకోవాలి.కేవలం ఆకలి తీర్చుకోవడమేగా అనుకోకూడదు. కూరగాయలు అధికంగా తీసుకోవాలి. ఫ్రిజ్లో ఉంచిన నిల్వ పదార్థాలు, కూరగాయలు తినడం వీలయినంతవరకూ తగ్గించాలి. అల్పాహారంతో రోజు ప్రారంభమవ్వాలి.ఆ తర్వాత మధ్యాహ్నం లో భోజనం నిండుగా తీసుకోవచ్చు. రాత్రి వీలయినంత తొందరగా ఆరు ఏడు గంటల మధ్య భోజనం తక్కువగా తీసుకోవాలి. మధ్యలో పాలు, పండ్లు, తీసుకోవాలి. ప్రతీ భోజనానికి కనీసం 4 గంటల వ్యవధి ఉండాలి. ఆహారం తర్వాత ముఖ్యమైనది వ్యాయామం.