‘തീപ്പൊരി’ പഠനത്തിന് സേഫ്റ്റി & ഫയർ എൻജിനിയറിങ്

സുരക്ഷാപ്രവർത്തനങ്ങളിൽ യോഗ്യത നേടിയവർക്കു വികസിതരാജ്യങ്ങളിൽ ഒട്ടേറെ തൊഴിലവസരം

- ബി.എസ്.വാരിയർ

അപകടം സംഭവിക്കുമ്പോൾ ആശ്വാസം പ്രവർത്തനങ്ങൾ ഉടൻ ലഭ്യമാക്കുന്നതു പോലെ പ്രധാനമാണ് അപകടങ്ങൾ ഒഴിവാക്കാനുള്ള സുരക്ഷാമാനദണ്ഡങ്ങൾ ആവിഷ്കരിച്ചു നടപ്പാക്കുന്നതും. സുരക്ഷാസംവിധാനങ്ങൾ ഏർപ്പെടുത്താതിരിക്കുക, ഉപകരണങ്ങൾ കാലികമായി പരിശോധിച്ച് കുറവുകൾ പരിഹരിച്ച് കൃത്യമായി പ്രവർത്തിക്കുമെന്ന് ഉറപ്പാക്കാതിരിക്കുക, മാനദണ്ഡങ്ങൾ ലംഘിച്ചും അശ്രദ്ധമായി പ്രവർത്തിച്ചും അപകടങ്ങൾ ക്ഷണിച്ചുവരുത്തുക തുടങ്ങിയ വീഴ്ചകൾ ഒഴിവാക്കുന്ന സാങ്കേതിക സേവനമാണ് സേഫ്റ്റി & ഫയർ പ്രഫഷനലുകൾ നിർവഹിക്കുന്നത്. അഗ്നിബാധാപ്രതിരോധത്തിനും അഗ്നിശമന പ്രവർത്തനങ്ങൾക്കും സയൻസിന്റെയും ടെക്നോളജിയുടെയും സിദ്ധികൾ പ്രയോഗിക്കുന്നതാണ് ഫയർ എൻജിനീയറിങ്ങിന്റെ മേഖല.