கயல்முக வேங்கையின் வனம்!

ஒரு நாவலாசிரியனுக்கு முன்னால் உள்ள சவால், தனது முந்தைய நாவல்களிலிருந்து மாறுபட்ட ஒன்றாக அவனது அடுத்த நாவல் அமையவேண்டும் என்பதுதான். புதிய களத்துடன் புனைவாக்கத்தில் அடுத்த கட்டத்தை எட்டுவதும் மிகவும் முக்கியம்.

- எம்.கோபாலகிருஷ்ணன்

அம்மன் நெசவு, மணல் கடிகை, மனைமாட்சி ஆகிய மூன்று நாவல்களும் எனக்கு நன்கு பரிச்சயமான களங்கள். அவற்றின் ஒவ்வொரு கதாபாத்திரமும் நேரடியாக நான் அறிந்தவர்கள். இருந்தபோதும்கூட இவை ஒவ்வொன்றையும் ஒன்று மற்றதிலிருந்து மாறுபட்டதாகவே எழுதினேன். இதற்கு அடுத்து என்ன எழுதுவது என்று யோசித்த வேளையில் சிறிய ஒரு நாவலை எழுதும் முயற்சியில்தான் 'தீர்த்த யாத்திரை'யை எழுதினேன்.

இந்த நான்கு நாவல்களுக்கும் ஒரு பொதுத்தன்மை உண்டு. மனித உறவுகள் சார்ந்த விசாரணை என்பது தான் அது. குடும்பம், ஆண் பெண் உறவுகள் போன்ற களங்களை எழுதுபவர் என்ற வரையறைக்குள் நின்றுவிடுவேனோ என்ற எண்ணம் எழுந்தது. எனக்கு முற்றிலும் அறிமுகமில்லாத ஒரு களத்தை எடுத்துக்கொண்டு கற்பனையின் துணைகொண்டு புனைவின் சாத்தியத்தைத் தொட்டுப் பார்க்கலாம் என்றெண்ணினேன். அதன் சிறிய தொடக்கமாக 'மாயப் புன்னகை'யை எழுதினேன். முடியும் என்ற நம்பிக்கை பிறந்தது.