கேரளாவை உலுக்கும் டாக்டர் கொலை!

அதிர்ச்சி என்றால் அதிர்ச்சி... அப்படியொரு அதிர்ச்சியில் சிலையாக நிற்கிறார்கள் கேரள மக்கள். காரணம், டாக்டர் வந்தனா தாஸின் கொலை

- என்.ஆனந்தி

காவல்துறையின் கஸ்டடியில் இருந்த ஒரு நபருக்கு சிகிச்சை அளிக்கும்போது, அவரால் கத்தியால் குத்தப்பட்டு உயிரிழந்திருக்கிறார் 23 வயதான டாக்டர் வந்தனா. இதனால் மக்கள் கொந்தளிக்க, டாக்டர்களுக்கு பாதுகாப்பு கொடுக்க முடியாவிட்டால் அரசு மருத்துவமனைகளை மூடிவிடுங்கள் என்று உயர் நீதிமன்றம் கண்டிக்கும் அளவுக்கு கேரளாவில் நிலைமை மோசமாகி இருக்கிறது.

கொல்லம் மாவட்டத்தில் உள்ள நெடும்பனாவில் பள்ளி ஆசிரியராக பணியாற்றி வருபவர் சந்தீப். குடிபோதையில் அக்கம் பக்கத்தினருடன் தகராறு செய்வதே இவரது பழக்கம்.  அப்படி ஒருநாள் சண்டையிட்டபோது அவரது காலில் காயமும் ஏற்பட்டுள்ளது. விஷயம் போலீஸுக்கு போக, அவர்கள் சந்தீப்பை காவல் நிலையத்துக்கு அழைத்துச் சென்றனர். வழியில் அவரது காலில் இருந்த காயத்தைக் கவனித்த போலீஸார் முதல் கட்டமாக அதற்கு சிகிச்சை அளிக்க கொட்டாரக்கரா என்ற இடத்தில் உள்ள அரசு மருத்துவமனைக்கு அழைத்துச் சென்றனர்.

அங்கிருந்த ஹவுஸ் சர்ஜனான வந்தனா தாஸ் அவருக்கு சிகிச்சை அளிக்கும்போது அங்கிருந்த அறுவை சிகிச்சைக்கு பயன்படுத்தும் கத்திரிக்கோல் மற்றும் கத்தியை எடுத்து வந்தனாவை தாக்கினார் சந்தீப்.