டார்க்நெட்

03. இணையம்‌ Vs ரகசிய இணையம்‌

- வினோத்‌ ஆறுமுகம்‌

நீங்கள் ஒரு நல்ல ஷூ வாங்கலாம் என கூகுளில் தேடுகிறீர்கள். உடனே நாம் எந்த வலைத்தளம் சென்றாலும் ஷூ பற்றிய விளம்பரங்கள் வரும்.  எந்த செயலியைத் திறந்தாலும் ஷூ பற்றிய விளம்பரங்கள் குவியும்.

இதுதான் இணையத்தில் உள்ள சிக்கல்.

நாம் பயன்படுத்தும் இணையம் என்பது முழுக்க முழுக்க நம் அடையாளங்களை, நம்மைப் பற்றிய தகவல்களைத் திரட்டிக் கொண்டே இருக்கும். திரட்டப்பட்ட தகவல்கள் இணைய நிறுவனங்களுக்கு பகிரப்படும். 

அப்படித்தான் நீங்கள் ஷூவைப் பற்றி இணையத்தில் தேட அந்தத் தகவல் பிற இணைய தளங்களுக்கும், செயலிகளுக்கும் பகிரப்பட்டுவிடும். இல்லை... இல்லை விற்கப்பட்டுவிடும். 

அதாவது இணையத்தைப் பயன்படுத்தி ஒரு பொருளைக் குறித்து தேடும்போது நீங்கள் எந்த பிரவுசரைப் பயன்படுத்துகிறீர்கள் என்பதில் ஆரம்பித்து எந்த இடத்தில் உள்ளீர்கள் என்பது வரை பல்வேறு தகவல்களை சம்பந்தப்பட்ட பொருளின் நிறுவனங்கள் திரட்டிவிடும்.

நீங்கள் ஃபேஸ்புக், யூடியூப், வாட்ஸ்அப்  பயன்படுத்துகிறீர்கள்தானே? அதை எல்லாம் பணம் கொடுத்தா பயன்படுத்துகிறீர்கள்?  

இல்லை. அப்படி என்றால் அந்நிறுவனங்கள் பல கோடி பயனாளர்களின் தகவல்களைச் சேமித்து வைக்க பல லட்சம் டாலர்களை ஏன் செலவு செய்ய வேண்டும்..? அவர்களுக்கு வருமானம் எப்படிக் கிடைக்கிறது / வருகிறது..?

நீங்கள் ஃபேஸ்புக், வாட்ஸ்அப் உள்ளிட்ட செயலியைப் பயன்படுத்தும் போது உங்களுக்கு காட்டப்படும் விளம்பரங்களில் இருந்து அந்நிறுவனங்களுக்கு வருமானம் வருகிறது.  

ஆனால், விளம்பரங்கள் கொடுக்கும் நிறுவனங்கள் தாங்கள் காண்பிக்கும் பொருளை கட்டாயம் வாங்க வைக்க அவர்களுக்கு உங்களைப் பற்றிய பல்வேறு தகவல்கள் தேவைப்படும். உங்களைப் பற்றி எவ்வளவு தகவல்கள் கிடைக்கிறதோ அவ்வளவுக்கு அவ்வளவு உங்களுடைய தேவை என்ன என்பதை  கணிக்க முடியும்.