ஒரு சிறு நிலத்துக்காக பெரும் பொய்!

அடைந்தால் மகாதேவி இல்லையேல் மரணதேவி எனும் இறுதி நிலைக்கு வந்து சேர்ந்திருக்கிறார்கள் மணிப்பூர் கலவரத்தில் பெரிதும் பாதிக்கப்பட்ட குக்கீஸ் பழங்குடி இன மக்கள்

- டி.ரஞ்சித்

கடந்த மே மாதம் 3ம் தேதி மணிப்பூர் உயர்நீதிமன்றம், ‘மணிப்பூரின் பெரும்பான்மை பிற்படுத்தப்பட்ட இந்து சமூகமான மெய்தி சமூகத்தையும் பழங்குடி பட்டியலில் சேர்க்கவேண்டும்’ என்ற உத்தரவுக்குப் பின்னணியில் அம்மாநிலத்திலும் மத்தியிலும் ஆளும் பாஜகவின் இந்துத்துவா அரசியல் இருக்கிறது என்று குற்றம்சாட்டுகிறார்கள் சமூக ஆர்வலர்கள்.

மெய்தி சமூகத்தின் சில பிரிவுகள் பட்டியல் இனத்திலும், பல பிரிவுகள் மிகவும் பிற்படுத்தப்பட்டோர் பட்டியலிலும் இருந்தாலும் இந்த எல்லா மெய்தி சமூகமும் தங்களை பழங்குடி பட்டியலில் சேர்க்கவேண்டும் என்ற கோரிக்கையை கடந்த 10 வருடங்களாக வைத்துக் கொண்டிருக்கிறார்கள்.

மணிப்பூரின் 3 முக்கியமான சமூகங்கள் மெய்தி, குக்கீஸ் மற்றும் நாகா இன மக்கள். இதில் மெய்திகள் அதிமாக பிற்படுத்தப்பட்ட சமூகம். மற்ற இரண்டுமே பழங்குடி மக்கள். நிலவியல்படி மணிப்பூரின் 90 சதவீத பரப்பு மலையும் மலை சார்ந்த காடுகளும்தான்.

இதில்தான் பழங்குடிகளான குக்கீஸ் மற்றும் நாகா இன மக்கள் வாழ்கிறார்கள். பிற்படுத்தப்பட்ட சமூகமான மெய்திகளில் பெரும்பான்மையானோர் மணிப்பூரின் தலைநகரான இம்ஃபால் உட்பட சமவெளி பகுதிகளில் வசிக்கிறார்கள்.

ஆங்கிலேயர் இந்தியாவை ஆள்வதற்கு முன்பாக இந்தியாவின் சமூகப் பிரிவுகளுக்கு குறிப்பிட்ட பெயர் எல்லாம் கிடையாது. ஆங்கிலேயர் ஆட்சியில்தான் இன்னாருக்கு இன்ன பெயர் என்று சூட்டப்பட்டது. அப்படித்தான் மணிப்பூரிலும் குக்கீஸ், நாகா, மெய்தி என்று மக்கள் தங்களை அடையாளம் கண்டுகொண்டனர்.

பிரிட்டிஷ் ஆட்சிக்காலத்திலேயே மணிப்பூரின் மற்ற சமூகங்களைவிட மெய்தி சமூகப் பிரிவு ஓரளவு நல்ல நிலையில் இருந்தது. இதனால் தங்களை பழங்குடி என்று சொல்வதற்கு அவை எதிர்ப்புக் காட்டின.

இன்றைய நிலையில் ஒரு  தலைநகருக்குத் தேவையான அனைத்து வசதிகளுடனும் அதுவும் அரசு வேலை, அரசு சேவைகளில் மிகவும் முன்னணியில் இருக்கும் சமூகம் இந்த மெய்தி சமூகம்தான்.

குக்கீஸ் மற்றும் நாகா போன்ற பழங்குடி சமூகங்களைவிட சமூக நிலையில் முன்னேறிய இடத்தில் இருக்கும் மெய்தி சமூகம், இன்று தங்களை பழங்குடி பட்டியலில் சேர்க்கவேண்டும் என்று தொடர்ச்சியாக கோரிக்கையை வைத்து போராடுவதற்கு பின்புலமாக பழங்குடிகளைப் பற்றிய சில பொய்ப் பிரசாரங்களே காரணம் என்கிறார்கள்.