இந்தியாவின் 5வது பணக்கார தயாரிப்பாளர்...பாலிவுட்டின் காட்ஃபாதர்...திருமணமாகாமல் இரு குழந்தைகளின் தந்தை!

பாலிவுட்டின் மோஸ்ட் வாண்டட் இயக்குநராகவும், தயாரிப்பாளராகவும், நிகழ்ச்சித் தொகுப்பாளராகவும், ரியாலிட்டி ஷோ நடுவராகவும் படுபிஸியாக இயங்கிக் கொண்டிருப்பவர் கரண் ஜோஹர்.

- பேராச்சி கண்ணன்

1998ல் அவரின் இயக்கத்தில் முதல்படமாக வெளிவந்து பலரின் மனதைக் கிறங்கடித்த ‘குச் குச் ஹோதா ஹை’ இப்போதும் கரணை பேச வைத்துக் கொண்டிருக்கிறது.
பின்னர், ‘காஃபி வித் கரண்’ நிகழ்ச்சியின் மூலம் உலகம் முழுவதுமான ரசிகர்களைக் கவர்ந்தார் கரண். கூடவே படங்கள் தயாரிப்பதும், இயக்குவதும், பிசினஸ் செய்வதும், அதற்கான முதலீடு போடுவதும் எனப் பன்முகத் தன்மையுடன் செயல்பட்டார்.  

இப்போது சினிமா இயக்குநராகி 25 ஆண்டுகளை நிறைவு செய்துள்ளார் கரண் ஜோஹர். இத்தனை ஆண்டுகளில் அவர் சுமார் 50 படங்களைத் தயாரித்துள்ளார். இதில் பத்து படங்கள் அவர் இயக்கத்தில் வந்தவை. இவற்றில் பெரும்பாலானவை சூப்பர் டூப்பர் ஹிட் அடித்தவை; வசூலில் சாதனை படைத்தவை. இந்நேரத்தில் கொஞ்சம் காஃபியுடன், கேஜோ எனச் செல்லமாக அழைக்கப்படும் கரண் ஜோஹர் பற்றிப் பேசலாம்.

1972ம் ஆண்டு மும்பையில் யாஷ் ஜோஹர், ஹிரூ ஜோஹருக்கு மகனாகப் பிறந்தவர் கரண் ஜோஹர். சிந்தி பஞ்சாபி குடும்பத்தைச் சேர்ந்தவர். தந்தை யாஷ் ஜோஹர் 1950களில் இருந்து பாலிவுட்டில் இருப்பவர். முதலில் இந்தி சினிமாவில் விளம்பரம் மற்றும் புகைப்படக் கலைஞராக வாழ்க்கையைத் தொடங்கி, பிறகு தயாரிப்பாளராக உயர்ந்தார்.
1976ல் ‘தர்மா புரொடக்‌ஷன்ஸை’ ஆரம்பித்தார். சில வெற்றிப் படங்களைத் தந்தார்.

இதனால், தயாரிப்பாளரின் மகனாக வசதிகளுடனே வளர்ந்தார் கரண். பள்ளிப் படிப்பு முடிந்ததும் கல்லூரியில் வணிகவியல் படித்தார். ‘‘எனது பெற்றோர் நான் சினிமா பிசினஸில் வரக்கூடாது என நினைத்தனர். என் அம்மாவோ எனக்கு நிலையான வேலையும், நிலையான வருமானமும் இருக்கவேண்டுமென ஆசைப்பட்டார். 

சினிமா ஒரு தொழில் அல்ல என்றார். நான் ஆர்ட்ஸ் படிப்பதை அவர் விரும்பவில்லை. அதனாேலயே காமர்ஸ் முடித்தேன். ஒரு நல்ல சிந்து பஞ்சாபி பையனாக அம்மாவின் பேச்சைக் கேட்டேன்...’’ எனச் சிரிக்கிறார் கரண்.