தன் ரசிகரை கொலை செய்தாரா கன்னட நடிகர்..?

ஷாக்தான். கர்நாடக மாநிலம் மட்டுமல்ல... ஒட்டுமொத்த தேசமும் அதிர்ச்சியில் வாயடைத்து நிற்கிறது.

- ஜான்சி

காரணம், தனது ரசிகரை, தானே அழைத்து சித்திரவதை செய்து கன்னட நடிகர் தர்ஷன் கொலை செய்திருக்கிறார் என்ற குற்றச்சாட்டு.

இது உண்மையா? இணையதளம் தொடங்கி பத்திரிகைத் துறை வழியாக செய்தி சேனல் விவாதங்கள் வரை இதுதான் ஹாட் டாபிக்.

தெலுங்கு - கன்னட மசாலா படங்களை மிஞ்சும் இச்செய்தி உண்மையா?

காவல்துறையினர் விசாரித்து வருகிறார்கள். வழக்கை நடத்தி தீர்ப்பு சொல்ல நீதிமன்றம் காத்திருக்கிறது.

ரைட். யார் இந்த தர்ஷன்?

1966ல் வெளிவந்த ‘தொகுதீப’ என்ற கன்னடப் படத்தில் நடித்ததன் மூலம் பிரபலமானவர் ஸ்ரீநிவாஸ். நாடக நடிகரான இவர், இப்படத்தின் வழியாக புகழின் உச்சத்தில் ஏறத் தொடங்கினார். இதன் பிறகு இவர் பெயர் ஸ்ரீநிவாஸ் தொகுதீப என்றே மாறியது. பெரும்பாலும் நெகடிவ் கேரக்டரில் நடித்தார். ஆனால், நிஜத்தில் இவரைப் போல் நல்லவர் இல்லை... மனிதர்களை நேசிக்கும் பண்பில் சிறந்தவர் என்றெல்லாம் இவரைக் குறித்து கன்னட திரையுலகமும் கர்நாடகமும் புகழ்கிறது.

இந்த ஸ்ரீநிவாஸ் தொகுதீபின் மகன்தான் தர்ஷன். இவருக்கு வீட்டில் சூட்டப்பட்ட பெயர் ஹேமந்த் குமார்.

‘நினஷம்’ என்ற திரைப்பட பயிற்சிப் பள்ளியில் படித்த ஹேமந்த் குமார், பி.சி. கௌரிஷங்கர் என்ற ஒளிப்பதிவாளரிடம் உதவியாளராக இருந்தார்.

முதலில் ஒரு தொலைக்காட்சித் தொடரில் நடித்த ஹேமந்த்திற்கு 1997ம் ஆண்டு வெளிவந்த ‘மகாபாரதா’ என்ற படத்தில் நடிக்கும் வாய்ப்பு கிடைத்தது. தர்ஷன் என்ற பெயரோடு நடிக்க ஆரம்பித்த அவருக்கு ஆரம்பத்தில் சின்னச் சின்ன பாத்திரங்களே கிடைத்தன.

தமிழில் சூப்பர் ஹிட் அடித்த விஜய்காந்தின் ‘வல்லரசு’ கன்னடத்தில் ரீமேக் செய்யப்பட்டபோது அதிலும் சிறிய கதாபாத்திரத்திலேயே தோன்றினார்.

இந்நிலையில் 2001ம் ஆண்டு பி.என்.சத்யாவின் இயக்கத்தில் வெளியான ‘மெஜஸ்டிக்’ பெரும் வெற்றிப் படமாக அமைந்தது. இதற்குப் பிறகு இவர் நடித்து வெளியான சில படங்கள் வெற்றிப் படங்களாக அமையவே, கன்னடத் திரையுலகின் முன்னணி நடிகர்களில் ஒருவரானார் தர்ஷன்.

இதனால் இவரது ரசிகர்கள் இவரை ‘சேலஞ்சிங் ஸ்டார்’ என அழைக்கத் தொடங்கினர்.