இரண்டு நான்கு கேட்டால் கிடைக்கும்!

ஒளிப்பதிவாளரும் நடிகருமான நட்ராஜ், கோலிவுட் முதல் பாலிவுட் வரை புகழ் பெற்றவர். ஆனால், எளிமையாக, யதார்த்தமாகப் பழகக்கூடியவர். அவருடைய மென்மையான வார்த்தைகள் கடினமான மனிதர்களையும் கரைய வைத்துவிடும். 

- எஸ்.ராஜா

‘யூத்’, நாளை’, ‘மிளகா’, ‘கர்ணன்’, ‘சதுரங்கவேட்டை’, ‘பரினீதா’, ‘ராஞ்சனா’ உட்பட பல படங்களில் ஒளிப்பதிவாளராகவும் நடிகராகவும் தன் திறமையை வெளிப்படுத்தியவர். இப்போது இயக்குநர்கள் தேடும் நடிகராக வலம் வந்துகொண்டிருக்கிறார். சமீபத்தில் இவர் நடித்த ‘பிரதர்’, ‘கங்குவா’ வெளியான நிலையில் நட்ராஜ் என்கிற நட்டியை சந்தித்தோம்.

வெற்றிகரமான கேமராமேனாகவும், நடிகராகவும் கால் நூற்றாண்டாக பயணம் செய்து வருகிறீர்கள். இப்போது உங்கள் வெற்றியை எப்படி எடை போட்டு பார்க்கிறீர்கள்?

இதுல எடை போடுறதுக்கு என்ன இருக்கு! வாய்ப்பு கொடுத்த தயாரிப்பாளர்கள், இயக்குநர்களுக்குதான் நன்றி சொல்லணும். 

இன்ட்ரஸ்ட்டிங்கான ரோல் இருந்துச்சுன்னா நட்டியை கூப்பிடுங்கன்னு நடிக்க வாய்ப்பு கொடுக்கிறாங்க. கேமராமேனா கடின உழைப்பு தேவைப்படும்போது நட்டியை கூப்பிடுங்கன்னு சொல்றாங்க. இது எல்லாமே கடவுள் கொடுத்தது.

எந்த வேலையிலும் கஷ்டம், சந்தோஷம் இருக்கும். கஷ்டத்தை தவிர்க்க முடியாது. கஷ்டப்பட்டால்தான் முன்னேற முடியும். அந்தவகையில் எனக்கு வாய்ப்பு கொடுத்த அனைவருக்கும் நன்றி.

ஒரு படத்தை உள் உணர்வுகளுடன் தேர்வு செய்வீர்களா அல்லது சினிமா கால்குலேஷன் ஏதேனும் இருக்கிறதா?

சினிமாவுல கால்குலேஷன் பண்ணி படம் பண்ண முடியாது. எல்லாவற்றுக்கும் கதை முக்கியம். கதையை எப்படி போர்ட்ரைட் பண்ணப்போகிறார்கள் என்பதைத்தான் பார்ப்பேன். அப்படி வந்த படங்கள்தான் ‘மிளகா’, ‘சதுரங்கவேட்டை’, மகாராஜா’, ‘கடைசி உலகப் போர்’.

அந்த வகையில் கதாபாத்திரம், கதை நடக்கும் காலகட்டம் பிடிக்கும்போது பண்ணுகிறேன். மக்கள் மத்தியில் சேர்ந்துவிடும்னு உள்ளுணர்வும் ஓரளவு சொல்லிவிடும். ப்ளாக் பஸ்டர் ஆவது இறைவன் அருள்.

எந்த நடிகருடன் நடிக்கும்போது கவனமாக இருப்பீர்கள்?

இங்கு வாய்ப்பு கிடைத்தவர்கள், கிடைக்காதவர்கள் என்ற வித்தியாத்தை தவிர மற்றபடி எல்லோரும் திறமைசாலிகள். கதாபாத்திரத்தை புரிஞ்சுக்கிட்டா தூள் கிளப்பிடுவாங்க. டவுட் வரும்போதுதான் கொஞ்சம் தடுமாறுவாங்க.