അച്ചുവിന്റെ അമ്മയിൽ നിന്നും ക്വീൻ എലിസബത്തിലേക്ക്...

ഈ ജോഡികളെ പ്രേക്ഷകർ ഒരിക്കൽ കണ്ടിരുന്നു. ഒരിടവേള കഴിഞ്ഞ് വീണ്ടും അവരെ ഒരുമിച്ച് കാണുകയാണിപ്പോൾ... ക്വീൻ എലിസബത്ത് എന്ന ചിത്രത്തിൽ.

- ജി. കൃഷ്ണൻ 

സിനിമയ്ക്കു വേണ്ടി ചില കഥകൾ സൃഷ്ടിക്കപ്പെടുമ്പോൾ കഥാപാത്രങ്ങൾക്ക് അനുസൃതമായ അഭിനേതാക്കളിലേയ്ക്ക് ആ കഥ സഞ്ചരിക്കുന്ന പാത ചിലപ്പോൾ കല്ലും മുള്ളും നിറഞ്ഞതായിരിക്കും. വിഘ്നങ്ങളെ മറികടന്നിട്ടാകണം ചിലയവസരങ്ങളിൽ ആ യാത്ര ലക്ഷ്യസ്ഥാനത്തെത്തുക

മദ്ധ്യവയസ്ക്കരായ അലക്സ്- എലിസബത്ത് എന്നിവരുടെ കഥ സിനിമയാകുമ്പോൾ ആ കഥാ പാത്രങ്ങളായി ആരഭിനയിക്കണം എന്നൊരു ചിന്തയ്ക്ക് തീരു മാനങ്ങളൊന്നുമുണ്ടായിരുന്നില്ല. ഇവിടെ, അത് സ്വാഭാവികമായി വന്നുഭവിച്ചതാണ്. നരേനും മീരാജാസ്മിനും.

ഈ ജോഡികളെ പ്രേക്ഷകർ ഒരിക്കൽ കണ്ടിരുന്നു. ഒരിടവേള കഴിഞ്ഞ് വീണ്ടും അവരെ ഒരുമിച്ച് കാണുകയാണിപ്പോൾ... ക്വീൻ എലിസബത്ത് എന്ന ചിത്രത്തിൽ.

ഈ കഥയിലെ അലക്സും എലിസബത്തുമായി അവർ വരുന്നു.

ജീവിതത്തിന്റെ യൗവനകാലഘട്ടം കഴിഞ്ഞശേഷമുള്ള ദാമ്പത്യജീവിതത്തിലെ ചില നിമിഷങ്ങളും നന്മകളുമാണ് ഈ സിനിമയിൽ ഊടും പാവുമായി വരുന്നത്.

അലക്സ് ഒരു ഷോപ്പ് നടത്തുന്നു. എലിസബത്താകട്ടെ ഒരു ഇന്റീരിയൽ ഡിസൈനറാണ്. അതിലുപരി നല്ലൊരു ബിസിനസ് വുമൺ ആണെന്നും പറയാം.

എലിസബത്തിന് ഇവിടെ അഭിനയിക്കാൻ ഒരുപാട് മുഹൂർത്തങ്ങളുണ്ട്. അത് ഫലിപ്പിക്കാൻ അതുപോലെ കഴിവുള്ള ഒരാർട്ടിസ്റ്റായിരിക്കണമെന്ന നിർബന്ധവും ഉണ്ടായിരുന്നു. ആ ചിന്തയിൽ നിന്നുമാണ് മീരയിലേയ്ക്ക് എത്തിയതെന്ന് ഈ സിനിമയുടെ തിരക്കഥാകൃത്ത്അർജുൻ ടി. സത്യൻ പറഞ്ഞു.