ഭാഷ ഏതായാലും കഥ നന്നായാൽ മതി

ഭാഷ ഏതായാലും കണ്ടന്റ് നല്ലതാണെങ്കിൽ മലയാളികൾ സിനിമ ഇരുകൈ നീട്ടി സ്വീകരിക്കും

- അപ്പൂസ് കെ.എസ്

നൂറുകോടി ബഡ്ജറ്റിൽ ഒരു മലയാള സിനിമ എന്നത് ഒരു പത്തുവർഷം മുൻപ് ചിന്തിക്കാൻ പോലും പറ്റാത്ത കാര്യമായിരുന്നു. എന്നാൽ ഇന്ന് വിരലിലെണ്ണാവുന്ന ദിനങ്ങൾ കൊണ്ടാണ് നൂറുകോടി ക്ലബ്ബിലേക്ക് മലയാള സിനിമ കടന്നു കൊണ്ടിരിക്കുന്നത്. ഏതാണ്ട് അഞ്ച് വർഷങ്ങൾക്ക് മുൻപു വരെ മലയാള സിനിമയിൽ അഞ്ച് കോടി രൂപയ്ക്ക് മുകളിൽ വരുന്ന ചിത്രങ്ങൾ ബിഗ് ബഡ്ജറ്റും ബ്രഹ്മാണ്ഡവും ആകുന്നിടത്താണ് ഇന്ന് രണ്ടും മൂന്നക്കവുമൊക്കെ കടന്ന് കോടികളിലേക്ക് സിനിമാ ബഡ്ജറ്റ് പോകുന്നത്. കൂടുതൽ ലാഭം കൊയ്യുന്നതിന് കൂടുതൽ സാധ്യതകളാണ് മലയാളസിനിമയ്ക്ക് ഇന്നുള്ളത്. മുടക്കുമുതൽ കൂടുന്നതിനനുസരച്ച് ലാഭവും തിരിച്ചുപിടിക്കാൻ കഴിയുമെന്ന ആശ്വാസം നിർമ്മാതാക്കൾക്കുമുണ്ട്.

എല്ലാത്തരം ചേരുവകളും ഉൾപ്പെടുന്ന മലയാള ചിത്രങ്ങൾ ഇന്ന് ആസ്വാദകർക്ക് സുലഭമാണ്. മലയാള ചിത്രങ്ങളെ ഏറെ ഇഷ്ടപ്പെടുന്ന അന്യഭാഷാ പ്രേമികളുടെ എണ്ണവും വർദ്ധിച്ചു കൊണ്ടിരിക്കുകയാണ്. മലയാള സിനിമയോട് അന്യഭാഷക്കാർക്ക് പ്രിയം കൂടുന്നതു പോലെ തന്നെ മലയാളികൾക്ക് അന്യഭാഷാ ചിത്രങ്ങളോടും പ്രിയം ഇപ്പോൾ ഏറി വരികയാണ്.