മീമുകളിലും ട്രോളുകളിലും നിറയുന്ന ക്ലാസിക് കഥാപാത്രങ്ങൾ

സാങ്കേതികത്വങ്ങൾ മാറിയതോടെ മലയാള സിനിമയുടെ രൂപത്തിലും ഭാവത്തിലും അവതരണത്തിലുമെല്ലാം അടിമുടി മാറ്റം വന്നിരിക്കുകയാണ്

- അനീഷ് മോഹനചന്ദ്രൻ

കാലത്തിന്നതീതമായി സഞ്ചരിക്കുന്ന ചില കഥാപാത്രങ്ങളുണ്ട് മലയാളസിനിമയിൽ(വാണിജ്യ സിനിമ. സിനിമകൾ കാലയവനികയ്ക്കുള്ളിലേക്ക് മറഞ്ഞാലും അതിലെ ചില കഥാപാത്രങ്ങൾ കാലത്തിനതീതമായി നിലനിൽക്കും. മലയാളസിനിമയുടെ സുവർണ്ണകാലഘട്ടമെന്ന് വിശേഷിപ്പിക്കാവുന്ന 80 കളിലും 90 കളിലുമാണ് ഇത്തരം കഥാപാത്രങ്ങളിൽ പലതും ജന്മമെടുത്തിട്ടുള്ളത്. ഒരുദാഹരണമായി റാംജിറാവുവിനെ പരിഗണിക്കാം. മലയാളസിനിമയിൽ അന്നും ഇന്നും വില്ലൻ കഥാപാത്രങ്ങൾക്ക് പഞ്ഞമൊന്നുമില്ല. പക്ഷേ, റാംജി റാവുവിന് പകരം റാംജിറാവു മാത്രമാണുള്ളത്. ഒരു പൊടിക്ക് മണ്ടത്തരം കൈമുതലായുള്ള പ്രൊഫഷണൽ കിഡ്നാപ്പർ. അതുപോലെ മറ്റൊരുദാഹരണമാണ് ജോൺ ഹോനായി. മലയാളസിനിമയിൽ അന്നും ഇന്നും ഒരൊറ്റ ജോൺ ഹോനായി മാത്രമേയുള്ളൂ. പേരെടുത്ത് പറയുകയാണെങ്കിൽ അങ്ങ് പവനായി മുതൽ അഞ്ഞൂറാനും പച്ചാളം ഭാസിയും അത്തരത്തിലുള്ള കഥാപാത്രങ്ങളാണ്.