വ്യായാമം കളിയല്ല

വ്യായാമം ചെയ്യുമ്പോൾ ഭക്ഷണം; വസ്ത്രം എങ്ങനെ; എത്ര വെള്ളം കുടിക്കണം; സുരക്ഷയും നോക്കണം

വ്യായാമം തുടങ്ങാൻ കാരണം, ഏതെങ്കിലും ജീവിതശൈലീരോഗത്തെ പ്രതിരോധിക്കാനാകാം. ശരീരം കൂടുതൽ ഫിറ്റ് ആകാനോ തടി കുറയ്ക്കാനോ ആകാം. എന്തായാലും, ലക്ഷ്യം കൃത്യമായി തീരുമാനിക്കുകയാണ് ആദ്യം ചെയ്യേണ്ടത്. നേടാൻ കഴിയുന്നതായിരിക്കണം, ഈ ലക്ഷ്യം. തുടക്കത്തിലേ അപ്രാപ്യമായ ലക്ഷ്യങ്ങൾ സ്വീകരിച്ചാൽ, ഏതാനും ദിവസം കൊണ്ട് വ്യായാമം ചെയ്യാനുള്ള ആവേശം നശിക്കും.

ഉദാഹരണത്തിന്, രണ്ടാഴ്ച കൊണ്ട് 10 കിലോ ഭാരം കുറയ്ക്കുക അസാധ്യവും അനാരോഗ്യകരവുമായ ലക്ഷ്യമാണ്. പകരം ആറുമാസം കൊണ്ട് ശരീരഭാരം 85 നിന്ന് 70 കിലോ ആക്കും എന്ന ലക്ഷ്യം പ്രായോഗികമാണ്. തുടർന്ന് ആ ലക്ഷ്യം നേടാൻ ഓരോ ദിവസവും എന്തു ചെയ്യും എന്നതും കൃത്യമായി പ്ലാൻ ചെയ്യണം. ഇതിന് ഒരു ഫിറ്റ്നസ് ഡയറി ഉപയോഗിക്കാം. ഫിറ്റ്നസ് ട്രെയ്ന സമീപിച്ച് നിർദ്ദേശം തേടുകയും ചെയ്യാം.

ഭക്ഷണം ശ്രദ്ധയോടെ

 ഓരോ ദിവസവും ശരീരത്തിന് ആവശ്യമുള്ള കാലറി, പ്രോട്ടീൻ, കൊഴുപ്പ്, നാരുകൾ എന്നിവയൊക്കെ കണക്കാക്കിയ ശേഷം അതിനനുസരിച്ച് ഭക്ഷണം തിരഞ്ഞെടുക്കണം. ഓരോ ദിവസത്തേക്കും വേണ്ട ഭക്ഷണത്തിന്റെ ചാർട്ട് തയ്യാറാക്കിയാൽ കാര്യങ്ങൾ എളുപ്പമാകും. വാരാന്ത്യങ്ങളിൽ ഇതിൽ നിന്ന് വ്യതിചലിക്കുന്നതിൽ വലിയ തെറ്റൊന്നുമില്ല.