അൽപം ശ്രദ്ധ, ബിപി നിയന്ത്രിക്കാം

ഹൃദയാഘാതം, പക്ഷാഘാതം എന്നീ ഗുരുതരാവസ്ഥകൾ, കൂടാതെ വൃക്കരോഗം, മറവിരോഗം പോലുള്ള മറ്റു പല രോഗങ്ങളിലും ഏറ്റവും അധികം പങ്കുവഹിക്കുന്ന അപായ ഹേതുവാണ് രക്താതിസമ്മർദം. രക്തസമ്മർദത്തിന്റെ അളവ് വർദ്ധിക്കുന്തോറും ഈ അപായ സാധ്യതയും വർദ്ധിക്കുന്നു

- ഡോ. പി. ശോഭ

ഹൈപ്പർടെൻഷൻ അഥവാ രക്താതിസമ്മർദ്ദം ഒരു വളരെ പ്രധാനപ്പെട്ട പൊതു ആരോഗ്യ പ്രശ്നമാണ്. ഈ രോഗം ഇനിയും വർദ്ധിക്കുവാനുള്ള സാധ്യതയുണ്ടെന്നാണ് പറയപ്പെടുന്നത്. 2008 ൽ 972 ദശലക്ഷം ആളുകൾക്ക് രക്താതിസമ്മർദ്ദം ഉണ്ടായിരുന്നുവെങ്കിൽ, ഇത് 2025 ൽ 1.56 ലക്ഷം കോടി ആകുമെന്നാണ് പ്രതീക്ഷിക്കുന്നത്. ഹൃദയാഘാതം, പക്ഷാഘാതം എന്നീ ഗുരുതരാവസ്ഥകൾ, കൂടാതെ വൃക്ക രോഗം, മറവിരോഗം പോലുള്ള മറ്റു പല രോഗങ്ങളിലും ഏറ്റവും അധികം പങ്കുവഹിക്കുന്ന അപായ ഹേതുവാണ് രക്താതിസമ്മർദം. രക്ത സമ്മർദത്തിന്റെ അളവ് വർദ്ധിക്കുന്തോറും ഈ അപായ സാധ്യതയും വർദ്ധിക്കുന്നു. ഇന്ത്യയിലും മറ്റു വികസ്വര രാജ്യങ്ങളിലും ഭീതിജനകമാവും വർദ്ധിക്കുന്നത്. ലോകാരോഗ്യ സംഘടനയുടെ ലോകാരോഗ്യ റിപ്പോർട്ട് പ്രകാരം 2002 മുതൽ രക്താതിസമ്മർദത്തെ, സർവ്വപ്രധാനമായ കൊലയാളി എന്നാണ് വിശേഷിപ്പിക്കുന്നത്.

എന്താണ് രക്തസമ്മർദം ?

രക്തസമ്മർദം കൊണ്ട് ഉദ്ദേശിക്കുന്നത്, ഹൃദയമിടിപ്പിനുസരിച്ച് രക്തം, രക്തക്കുഴലുകളിൽ കൂടി സഞ്ചരിക്കുമ്പോൾ ഈകുഴലുകൾ കൊടുക്കുന്ന സമ്മർദത്തെയാണ്.

എന്താണ് അക്കങ്ങൾ?

രണ്ട് അക്കങ്ങൾ ഉപയോഗിച്ചാണ് രക്തസമ്മർദം സാധാരണ നിലയിലാണോ അല്ലയോ എന്നു തീരുമാനിക്കുന്നത്. ഒരു രേഖ വരച്ച് അതിന്റെ മുകളിലും താഴെയുമായിട്ടാണ് ഈ അക്കങ്ങൾ കുറിക്കുന്നത്. മുകളിലെ അക്കം സിസ്റ്റോളിക് ബ്ലഡ് പ്രഷർ ആണ്. എന്നുവച്ചാൽ ഹൃദയമിടിപ്പിനൊപ്പം കിട്ടുന്നത് എന്നർത്ഥം, രേഖയുടെ താഴെയുള്ള അക്കത്തിനെ ഡയസ്റ്റോളിക് ബ്ലഡ് പ്രഷർ എന്ന് വിശേഷിപ്പിക്കുന്നു, എന്ന് വച്ചാൽ ഹൃദയം വിശ്രമിക്കുമ്പോൾ രക്തക്കുഴലുകളിൽ ഉള്ള രക്തസമ്മർദം എന്നാണ്. ശരാശരി ഒരാൾക്ക് 120/80 മി മി മെർക്കുറി രക്തസമ്മർദ്ദം ആണ് വേണ്ടത്. പക്ഷേ, ഇത് പ്രായത്തിന് അനുസരിച്ച് മാറുന്നു. കൂടാതെ രക്താതിസമ്മർദത്തിന്റെ തീവ്രത അനുസരിച്ച് അക്കങ്ങളുടെ ശ്രേണി മാറുന്നു.

രക്തസമ്മർദം അളക്കാൻ ഉപകരണം

സ്ഫിഗ്മാമാനോമീറ്റർ എന്ന ഉപകരണം ഉപയോഗിച്ചാണ് രക്തസമ്മർദം അളക്കുന്നത്. പക്ഷേ, മെർക്കുറി വളരെ ഹാനികരമായ രാസവസ്തുവായതിനാൽ, ഇന്ന് അന്റോയ്ഡ്, ഡിജിറ്റൽ ഉപകരണങ്ങളും രക്തസമ്മർദം അളക്കാൻ ലഭ്യമാണ്.

രക്താതിസമ്മർദം എന്ന ഹിമശില

 സാഗരങ്ങളിൽ കാണുന്ന ഹിമശിലമായി ഉപമിക്കാവുന്ന ഒരു പ്രശ്നമാണിത്.