உருவம், உடை, அலங்காரம்...கிண்டலுக்குரியதா?

சமீபத்தில் நாளிதழில் கல்லூரி மாணவி ஒருவர் எழுதிய கடிதம் பிரசுரமாகி இருந்தது. 'நான் சற்றுப் பருமனாகவும், கருமையான நிறம் உடையவராகவும் இருப்பதால் சிறுவயது முதலே உருவக் கேலியை சந்தித்து வந்திருக்கிறேன், எனக்கு எத்தனையோ நல்ல பண்புகள், திறமைகள் இருந்தாலும் எல்லாவற்றையும் மீறி அதையே ஏன் பேசுகிறார்கள்?' என்று கேட்டிருந்தார்.

- டாக்டர் அகிலாண்ட பாரதி

சமீபத்தில் சாலையில் வைத்து அவரை முதன்முறையாக சந்தித்த உறவினர் ஒருவரும் இதைப் பற்றியே பேசியிருக்கிறார். ஏன் இப்படி என்பது அந்த மாணவியின் ஆதங்கம்.

வாழ்வில் ஒரு முறையேனும் அனைவரும் உருவக்கேலியை சந்தித்திருப்போம். ஏன் ஒல்லியாக இருக்கிறாய்? ஏன் குண்டாக இருக்கிறாய்? உனக்கு நிறம் ரொம்பக் குறைவு, எப்படி உனக்கு மட்டும் நம் குடும்பத்தில் இல்லாத அளவுக்கு இவ்வளவு வெள்ளை நிறம் வந்தது? என்றெல்லாம் நாம் பெரிதும் மதிக்கும் நட்பு மற்றும் உறவு வட்டத்தில் இருந்தே கேலிகள் வந்திருக்கும். சாமுத்திரிகா லட்சணப்படியான துல்லியமான உடல் அமைப்பு என்றாலும் யாராவது ஒருவர் அது சரியில்லை இது சரியில்லை என்றிருப்பார்கள்.

நானும் கூட அதற்கு விதிவிலக்கல்ல. என்னை விட பருமனான தோற்றமுடய மதிப்புமிக்க பெரிய மனிதர் அவர். என்னுடைய புதிய நாவலை வாசித்து விட்டு அதைப் பற்றி பாராட்டுவதற்காக அழைத்தேன் என்றவர் ஐந்து நிமிடம் நூலை பற்றி பேசிவிட்டு, மீதமிருந்த இருபது நிமிடம் என் உருவத்தைப் பற்றித் தான் பேசினார். வயதுக்கு மதிப்பளித்து சிரித்துக் கொண்டே சமாளித்தேன். இதற்கு முன் இதே மனிதர் என் மகளையும் கிண்டல் அடித்திருக்கிறார்.