மதத்தினும் பெரிது மனிதம்! அயோத்தி

மனித இனம் தோன்றி எத்தனையோ பேரிடர்களைக் கண்ட பிறகும், இந்த உலகில் இன்னமும் நாம் வாழ்ந்து கொண்டிருக்கிறோம் என்றால், அதன் காரணம் நிச்சயமாய் நம்மிடம் மிச்சமிருக்கும் மனிதம்தானே அன்றி பிறிதொன்றில்லை.

நாடென்று வரையறுத்துக் கொண்ட எல்லைகளை கடந்தும், உலகத்தின் எதோ ஒரு மூலையில் பாதிக்கப்படும் மக்களுக்காக கண்ணீர் சிந்துவதும், கேரளாவில் மழை வெள்ளம் வந்தால் தமிழ்நாட்டிலிருந்து உணவும், உடைகளும் செல்வதும், எங்கோ ஒரு குழந்தையின் மருத்துவ செலவிற்கு முகம் தெரியாத யாரோ ஒருவர் தன்னாலான பணத்தை அனுப்புவதும், மனித இனத்திடையே மீதமிருக்கும் கருணையின் மீச்சிறு எடுத்துக்காட்டுகள்.

நாடு, இனம், மதம், மொழி, சாதி என்று எத்தனையோ பிரிவினைகள் நம்மை ஆட்கொண்ட போதும், மனதை நெகிழ வைக்கும் எத்தனையோ நிகழ்வுகள் அன்றாடம் நம்மிடையே அரங்கேறிக் கொண்டுதான் இருக்கிறது. அப்படியான ஒரு நிகழ்வை மையமாக கொண்டு, மனிதர்கள் மீதும் மனிதத்தின் மீதுமான கைப்பிடி நம்பிக்கையை அதிகரிக்கும் வண்ணம் அண்மையில் வெளியாகி இருக்கிறது 'அயோத்தி' தமிழ் திரைப்படம்.