മുതൽമുടക്കില്ലാതെ തുടക്കം മാസം 40,000 വരുമാനം

കാര്യമായ നിക്ഷേപം നടത്താതെ, ജോലിക്കാരെ ഒപ്പം കൂട്ടാതെ, കുടുംബത്തിനു ജീവിക്കാനുള്ള വരുമാനം നേടുന്ന യുവസംരംഭകനെയും അദ്ദേഹത്തിന്റെ ലഘുസംരംഭത്തെയും പരിചയപ്പെടാം.

തൃശൂർ ജില്ലയിലെ അയ്യൻകുന്നിനടുത്ത് തന്റെ വീടിനോടു ചേർന്നാണു ജസ്റ്റിൻ തോമസെന്ന ചെറുപ്പക്കാരൻ ഒരു ലഘുസംരംഭമെന്ന നിലയിൽ ബാത് സോപ്പ് നിർമാണം ആരംഭിക്കുന്നത്. ഇതൊരു സാധാരണബാത് സോപ്പല്ലെന്നും തേനും മെഴുകുമെല്ലാം ചേർന്നുള്ള ആരോഗ്യബാത് സോപ്പാണെന്നും അദ്ദേഹം പറയുന്നു. സ്വയം വികസിപ്പിച്ചെടുത്ത സാങ്കേതികവിദ്യ അടിസ്ഥാനപ്പെടുത്തിയാണു നിർമാണം.

"ചർമസംരക്ഷണം, ശുചിത്വം, പ്രകൃതിദത്തം' എന്നിവയാണ് സോപ്പ് നിർമാണത്തിൽ ഈ യുവസംരംഭകന്റെ മുദ്രാവാക്യം. നാച്ചുറൽ ഹെർബൽ സോപ്പെന്നും ജസ്റ്റിൻ അവകാശപ്പെടുന്നു. നാലു വർഷം മുൻപാണ് ഈ യുവാവ് ഒരു ജീവിതമാർഗമെന്ന നിലയിൽ ആരോഗ്യസോപ്പിന്റെ നിർമാണം തുടങ്ങുന്നത്. ഇതിന്റെ കൂടെ ഷാംപൂ, ഹെയർ ഓയിൽ തുടങ്ങി ഏതാനും ഇനങ്ങളുടെ റീ പാക്കിങ് ബിസിനസും നടത്തുന്നുണ്ട്. പഴങ്ങളുടെ പൾപ്പ്, ചാർക്കോൾ പൗഡർ, മുട്ടാണി മിട്ടി എന്നിവയിലും സോപ്പ് നിർമിക്കുന്നു. ഗോട്ട് മിൽക്ക് സോപ്പും ഉണ്ടാക്കുന്നുണ്ട്.

ഗ്ലിസറിൻ സോപ്പ് 

 കാസ്റ്റിക് സോഡ ചേർക്കാതെ ഗ്ലിസറിൻ അടിസ്ഥാനപ്പെടുത്തിയാണ് സോപ്പ് നിർമാണം. തേൻ, ബി വാക്സ്, എസൻഷ്യൽ ഓയിൽ, ഫ്രൂട്ട് പൾപ്പ്, ചാർക്കോൾ പൗഡർ, മുട്ടാണി മിട്ടി, ആട്ടിൻ പാൽ തുടങ്ങിയവയൊക്കെ അസംസ്കൃത വസ്തുക്കളുടെ പട്ടികയിൽ വരുന്നു. ബി വാക്സ് ഒഴികെയുള്ളവയെല്ലാം സുലഭമായി ലഭിക്കാനുണ്ടെന്നു ജസ്റ്റിൻ പറയുന്നു. ബി വാക്സ് തേനീച്ച കർഷകരിൽ നിന്നുമാണ് ശേഖരിക്കുക. 600 രൂപ മുതൽ 800 രൂപ വരെ ഇതിനു വിലയുണ്ട്. ആവശ്യമായ മണം കിട്ടുന്നതിനു പെർഫ്യൂമുകളും ചേർക്കും. മണം ഇല്ലാത്ത സോപ്പും നിർമിക്കുന്നുണ്ട്.