ഈ ബിരിയാണി അതല്ല, മത്സരിക്കുന്നത് ലെയ്സിനോട്

കുർക്കുറെ, ലെയ്സ് മോഡൽ ഉൽപന്നങ്ങളുമായി ഐടിസി, പെപ്സികോ എന്നീ വമ്പൻ ബ്രാൻഡുകളോട് മത്സരിച്ച് മാസം 40 ലക്ഷം വിറ്റുവരവാണ് പാലക്കാട്ടെ എബി ഫോർച്യൂൺ ഫുഡ്സ് നേടുന്നത്.

വെജ് ദം ബിരിയാണി, ഗ്രീൻ ബിരിയാണി, റൈസ് ബിരിയാണി ,ക്യാപ്സ് (CAPS)ചീസ് ബോൾ ഗോൾഡ്, റിങ് ആൻഡ് ലിറ്റിൽ റിങ്.... നല്ല വെറൈറ്റി പേരുകളല്ലേ? എബി ഫോർച്യൂൺ ഫുഡ്സ് പുറത്തിറക്കുന്ന കുർക്കുറെ, ലെയ്സ് മോഡൽ ഉൽപന്നങ്ങളാണിവ. ഐടിസി, പെപ്സികോ തുടങ്ങിയ വമ്പൻമാരോടാണ് പാലക്കാട് കരിപ്പോടിനടുത്തു പൂന്തോണിയിലുള്ള എബി ഫോർച്യൂൺ ഉടമ ഭവ്യന്തും മത്സരിക്കുന്നത്.

ചെറുപ്പത്തിലെ പ്ലാൻ ചെയ്ത ബിസിനസ്

ഭവ്യന്തും സുഹൃത്തായ അനീഷും ചേർന്നു തുടങ്ങിയ സ്ഥാപനമാണ് എബി ഫോർച്യൂൺ. ബ്രാൻഡഡ് ഉൽപന്നങ്ങളുടെ സ്നാക്സുകൾ ചെറുപ്പത്തിലേ കഴിക്കുമായിരുന്നു. അന്നുമുതൽ മനസ്സിൽ കൊണ്ടുനടന്ന ബിസിനസ് ആശയമാണിതെന്നു ഭവ്യന്ത് പറയുന്നു.

സ്നാക്സുകളുടെ വിതരണം ഏറ്റെടുത്തുകൊണ്ടായിരുന്നു ഭവ്യന്തിന്റെ തുടക്കം. മാർക്കറ്റിങ് സാധ്യതകളെക്കുറിച്ചു നന്നായി പഠിക്കുവാൻ ഇത് അവസരമൊരുക്കി. മികച്ച വിപണിയുള്ള, ലാഭം നേടാനാവുന്ന ബിസിനസ് അങ്ങനെ സ്വയം കണ്ടെത്തുകയായിരുന്നു. രണ്ടു വർഷത്തിലേറെയായി സംരംഭം നടത്തുന്നു. കോവിഡ് കാലത്തെ പ്രശ്നങ്ങൾ എല്ലാം മാറി, കമ്പനി നേടുന്നതു മികച്ച വളർച്ചയാണ്.