സ്വർണത്തിൽ ട്രേഡ് ചെയ്തു സമ്പത്തുണ്ടാക്കുന്ന സബീന

കടം വാങ്ങിയും ഉള്ള പണം മുടക്കിയും സ്വർണാഭരണം വാങ്ങിക്കൂട്ടുന്ന സ്ത്രീകൾക്കിടയിൽ സബിന വ്യത്യസ്തയാകുന്നത് 20,000 രൂപയിൽ ആരംഭിച്ച ഗോൾഡ് ട്രേഡിങ്ങിൽ ഇന്നു ലക്ഷങ്ങൾ വരുമാനം നേടുന്നിടത്താണ്.

- sanil abraham

കമ്മോഡിറ്റി മാർക്കറ്റിൽ വിജയിക്കുന്നവർ തീരെ കുറവാണ്. വിജയം ആവർത്തിക്കാൻ കഴിയാറുമില്ല. അത്രയും സങ്കീർണമാണ് മാർക്കറ്റെന്ന് ഇതിൽ പയറ്റുന്നവർ തന്നെ പറയും.

നഷ്ടം മൂലം ഇടപാടുകാർ വിട്ടുപോയതോടെ പല സ്ഥാപനങ്ങളും കമ്മോഡിറ്റി വ്യാപാരം തന്നെ അവസാനിപ്പിച്ചു. രാജ്യമെമ്പാടും കമ്മോഡിറ്റി വിപണിയിലേക്കു വരുന്നവരുടെ എണ്ണത്തിലും കുറവുണ്ട്.

അവിടെയാണ് തൃശൂർ ചെന്ത്രാപ്പിന്നി ചാമക്കാല സ്വദേശി സബീന വെന്നിക്കൊടി പാറിക്കുന്നത്. കൂടെ തുടങ്ങിയവരാരും ഇന്ന് ഈ രംഗത്തില്ല. എന്നാൽ, ഉറച്ച മനസ്സോടെ, പരാജയങ്ങളിൽ പതറാതെ, മാർക്കറ്റിനെ കുറ്റപ്പെടുത്താതെ, ഇതൊന്നും യാദൃച്ഛികതയോ ഭാഗ്യമോ അല്ലായെന്നു തറപ്പിച്ചു പറഞ്ഞ് സബീന മുന്നേറുകയാണ്.

സ്വർണത്തിലാണു പ്രധാനമായും ട്രേഡ് ചെയ്യുന്നത്. സിൽവറിലും കുറച്ചു ചെയ്യുന്നുണ്ട്. അറിവു നേടുക, ലോകചലനങ്ങൾ നിരീക്ഷിച്ചുകൊണ്ടേയിരിക്കുക, സ്വർണത്തിന്റെ ഗതിവിഗതികൾ അറിയാൻ ഇതേ പോംവഴിയുള്ളൂ. മൾട്ടി കമ്മോഡിറ്റി എക്സ്ചേഞ്ചിൽ (എംസിഎക്സ്) ട്രേഡ് ചെയ്യുന്ന സബീനയുടെ ട്രേഡ് സ്റ്റേറ്റ്മെന്റ് കണ്ടാൽ അദ്ഭുതപ്പെടാനുള്ള വകുപ്പുണ്ട്. നഷ്ടം വളരെ കുറവാണ്. ലാഭം വളരെ വളരെ കൂടുതലും. പ്രതിമാസം 80 - 90 % ആണ് വിജയശതമാനം.

സബീനയോട് എന്തു സംശയവും ആർക്കും ചോദിക്കാം. പക്ഷേ, കമ്മോഡിറ്റി ട്രേഡിങ് ഭാഗ്യത്തിന്റെ കളിയാണ്, ചൂതു കളിയാണ് എന്നു പറഞ്ഞേക്കരുത്. 2006 ൽ തുടങ്ങി ഇന്നു വരെ ഒരു കമ്മോഡിറ്റി വർക്കിങ് ഡേ പോലും കളയാതെ നേട്ടമുണ്ടാക്കണമെങ്കിൽ അത് ഭാഗ്യം മാത്രമല്ലല്ലോയെന്ന് സബീന തിരിച്ചു ചോദിക്കും. "നഷ്ടമില്ലെന്നല്ല, പക്ഷേ, കൃത്യമായി സ്റ്റോപ്പ് ലോസ് ഇട്ട് നഷ്ടം മാനേജ് ചെയ്യുന്നതാണു വിജയം.