ജാഗ്രത കാഷ്ലെസ്സ് പോളിസി നിങ്ങളെ കാഷ്ലെസ്സ് ആക്കാം

കാഷ്ലെസ്സ് ചികിത്സ - പറയാനെന്ത് എളുപ്പം - കിട്ടാനോ?

രാവിലെ 10 മണിയോടെ ഡിസ്ചാർജ് ചെയ്തതാണ്. പിന്നെ കാഷ്ലെസ്സ് പോളിസിയിൽ തുക അനുവദിക്കാനുള്ള കാത്തിരിപ്പ്. നാലു മണിക്ക് അന്വേഷിച്ചപ്പോൾ ആശുപത്രിക്കാർ പറയുന്നു, ഇൻഷുറൻസ് കമ്പനി ബിൽ തുക പാസാക്കിയില്ല. എപ്പോൾ, എത്ര സാങ്ഷനാക്കും എന്നറിയില്ല. അതിനാൽ, നിങ്ങൾ പണം അടച്ച് പൊയ്ക്കൊള്ളൂ, തുക അനുവദിക്കുമ്പോൾ അക്കൗണ്ടിലേക്ക് റീഫണ്ട് ചെയ്യാം എന്ന് കാഷ്ലെസ്സ് അല്ലേ ഞങ്ങൾ പണം അടയ്ക്കിലെന്നൊക്കെ വാദിച്ചു നോക്കി. സന്ധ്യയായതോടെ ഇൻഷുറൻസ് കമ്പനിയിൽ ആളില്ല, നിങ്ങൾക്കു പോകണമെങ്കിൽ പണമടയ്ക്കണം എന്നായി ആശുപത്രിക്കാർ. കാഷ്ലെസ്സ് പോളിസിയായതിനാൽ പണം കരുതിയിരുന്നില്ല. അവസാനം ഗത്യന്തരമില്ലാതെ ആരോടൊക്കെയോ രണ്ടു ലക്ഷത്തോളം രൂപ കടം വാങ്ങി അടച്ച് എട്ടു മണിയോടെ ആണ് വീട്ടിൽ പോകാൻ കഴിഞ്ഞത്. രണ്ടാം ദിവസം അനുവദിച്ചതാകട്ടെ 80,000 ത്തോളം രൂപ മാത്രം. കാഷ്ലെസ്സ് ചികിത്സ വാഗ്ദാനം ചെയ്യുന്ന ഹെൽത്ത് പോളിസിയിൽ വർഷങ്ങളായി പ്രീമിയം അടച്ചു വരുന്ന കൃഷ്ണകുമാർ ഇപ്പോൾ എടുത്ത കടം എങ്ങനെ തിരിച്ചടയ്ക്കുമെന്നോർത്ത് തല പുകയ്ക്കുകയാണ്. ഇത് ഒരാളുടെ അനുഭവമല്ല. കാഷ്ലെസ്സ് പോളിസി എടുത്തിട്ട് സമാന അനുഭവം നേരിടുന്ന പോളിസിയുടമകളുടെ എണ്ണം കൂടിവരികയാണ്.

കാഷ്ലെസ്സ് ചികിത്സ ഇങ്ങനെ

 രണ്ടുതരം ക്ലെയിം നടപടിക്രമങ്ങളാണ് ഇന്നുള്ളത്. ഒന്ന്, ആശുപത്രികളിൽ പണമടയ്ക്കാതെയുളള കാഷ്ലെസ്സ് ചികിത്സ. അതല്ലെങ്കിൽ ആശുപത്രി ചെലവുകൾ പൂർണമായും നാം നൽകിയശേഷം ഇൻഷുറൻസ് കമ്പനികൾ ചെലവായ തുക തിരികെ നൽകുന്ന റീ ഇംബേഴ്സ്മെന്റ് രീതി.