പലിശയ്ക്കു പണം കൊടുക്കുന്നവരുടെ ധർമസങ്കടങ്ങൾ

“എന്തു ചൂഷണം? പണം വെറുതെ കൊടുക്കാൻ കഴിയില്ലല്ലോ. അതിന് ഒരു തുക പ്രതിഫലം പലിശ -കിട്ടേണ്ടേ.

- കെ.കെ.ജയകുമാർ

വീടിനടുത്ത് ചെറുറോഡിൽ പതിവില്ലാത്ത ശബ്ദം കേട്ടാണ് ഉണർന്നത്. കഴിഞ്ഞ ദിവസം മരിച്ച ഗംഗാധരേട്ടന്റെ സംസ്കാരം ഇന്നാണ്. അണമുറിയാത്ത പ്രവാഹം തന്നെ. ബ്ലേഡ് ഗംഗു എന്നാണു നാട്ടിൽ അറിയപ്പെട്ടിരുന്നത്. കണ്ണിൽ ചോരയില്ലാത്തവൻ, അറുത്ത കൈയ്ക്ക് ഉപ്പുതേക്കാത്തവൻ... അങ്ങനെ പല പേരിലും ആക്ഷേപിക്കപ്പെട്ടു. നാട്ടുകാർക്കൊന്നും അത മതിപ്പില്ലായിരുന്നു.

എത്തുന്നവരൊന്നും ഈ നാട്ടുകാരല്ല. ഭാര്യ പുറത്തിറങ്ങി നോക്കി പ്രഖ്യാപിച്ചു.

“അതെങ്ങനാ ഇവിടെ എല്ലാവരെയും പിഴിയുകയായിരുന്നില്ലേ.' ഞാൻ പറഞ്ഞു.

അല്ലെങ്കിലും പണം കൊടുത്തു സഹായിക്കുന്നവരെയൊന്നും ആർക്കും മതിപ്പുണ്ടാകില്ലല്ലോ... ഭാര്യ പറഞ്ഞു.

"പണത്തിന് ആവശ്യമുള്ളവരെ ചൂഷണം ചെയ്യുന്നതാണോ സഹായം,' ഞാൻ ചോദിച്ചു.