പങ്കാളിത്ത പെൻഷൻ: ഭാവിയിലെ വൻനേട്ടം കളഞ്ഞുകുളിക്കണോ?

പുനഃപരിശോധനാ സമിതിയും പറയുന്നു; അവസാന ശമ്പളത്തെക്കാൾ പെൻഷൻ ലഭിക്കുന്ന സാഹചര്യം ഉണ്ടാകും.

സംസ്ഥാന സർക്കാർ ജീവനക്കാർക്കിടയിലെ ഇപ്പോഴത്തെ പ്രധാന ചർച്ചാവിഷയം പങ്കാളിത്ത പെൻഷൻ അവസാനിപ്പിച്ച് സർക്കാർ സ്റ്റാറ്റ്യൂട്ടറി പെൻഷൻ പദ്ധതി നടപ്പാക്കുമോ എന്നതാണ്. പങ്കാളിത്ത പെൻഷൻ ദീർഘകാലാടിസ്ഥാനത്തിൽ മികച്ച ലാഭം നേടിത്തരുമെന്നു ധനകാര്യ വിദഗ്ധർ അവകാശപ്പെടുമ്പോഴും സമീപകാലത്തു വിരമിച്ച ജീവനക്കാർക്കു നാമമാത്ര പെൻഷൻ മാത്രമാണു ലഭിക്കുന്നത് എന്നതു കാണാതിരുന്നു കൂടാ. പങ്കാളിത്ത പെൻഷൻ സർക്കാർ ജീവനക്കാർക്കു ലാഭമോ നഷ്ടമോ? പദ്ധതിയിൽ ഉടൻ ഒരു പൊളിച്ചെഴുത്ത് ഉണ്ടാകുമോ? പഴയ പെൻഷൻ രീതി സംസ്ഥാനത്തു തിരികെവരുമോ?

 ശമ്പളത്തെക്കാൾ കൂടിയ പെൻഷൻ

രണ്ടു വർഷം പൂഴ്ത്തിവച്ചിരുന്ന പങ്കാളിത്ത പെൻഷൻ പദ്ധതി പുനഃപരിശോധനാ റിപ്പോർട്ട് ഏറെ നിയമ യുദ്ധങ്ങൾക്കുശേഷം ഇപ്പോൾ പുറത്തുവന്നിരിക്കുകയാണ്. ദീർഘകാലത്തിൽ പദ്ധതി വൻനേട്ടം സമ്മാനിക്കുമെന്നാണു സമിതി റിപ്പോർട്ട് വ്യക്തമാക്കുന്നത്. ആരംഭിച്ച് 10 വർഷം കഴിഞ്ഞപ്പോൾ എസ്ബിഐ, എൽഐസി, യുടിഐ എന്നീ മൂന്നു ഫണ്ട് മാനേജർമാരും 10 ശതമാനം വളർച്ചയാണു നൽകിയിരിക്കുന്നത്. ദീർഘകാലത്തിൽ ഈ വളർച്ച വീണ്ടും ഉയരാം. അതായത് പെൻഷൻ ഫണ്ട് നന്നായി വളർന്നാൽ ജീവനക്കാരൻ അവസാനം വാങ്ങുന്ന ശമ്പളത്തെക്കാൾ പെൻഷൻ ലഭിക്കുന്ന സാഹചര്യം ഉണ്ടാകാമെന്നും കൂടുതൽ സർവീസുള്ളവർക്കു വലിയ തുക പെൻഷനായി ലഭിക്കുമെന്നും റിപ്പോർട്ടിലുണ്ട്. ലോകത്തെ എട്ടാമത്തെ അദ്ഭുതമായി ആൽബർട്ട് ഐൻസ്റ്റൈൻ വിശേഷിപ്പിച്ച കൂട്ടുപലിശയുടെ മാജികന്നെ കാരണം അറിയുന്നവർ അതു കൈക്കലാക്കും. അറിയാത്തവർ അതു കൊടുത്തുകൊണ്ടേയിരിക്കും, സമിതി റിപ്പോർട്ടിൽ പറയുന്നു. സമ്പാദ്യവും ഇക്കാര്യം നേരത്തേ വ്യക്തമാക്കിയിരുന്നു.

ഡിസിആർജി ഇല്ലെങ്കിലെന്താ?

 പങ്കാളിത്ത പെൻഷനിൽ 25-30 വർഷം നിക്ഷേപിച്ചാൽ അക്കൗണ്ടിൽ കാര്യമായ നീക്കിയിരിപ്പ് ഉണ്ടാകും. കേരളത്തിൽ ഇപ്പോൾ വിരമിക്കൽ ആനുകൂല്യമായി (DCRG) പരമാവധി 17 ലക്ഷം രൂപ ലഭിക്കുന്ന സ്ഥാനത്തു പങ്കാളിത്ത പെൻഷനിലുള്ളവർ വിരമിക്കുമ്പോൾ അക്കൗണ്ടിലെ 60% തുക പിൻവലിക്കാം. ഇത് ഇപ്പോൾ ലഭിച്ചുകൊണ്ടിരിക്കുന്ന ഡിസിആർജിയുടെ പല മടങ്ങു വരും. ഒപ്പം പെൻഷനായി മെച്ചപ്പെട്ട തുകയും ലഭിക്കും. അതിനാൽ പങ്കാളിത്ത പെൻഷനിൽ ഡിസിആർജി ഇല്ലെങ്കിലും ഖേദിക്കാനില്ല.

മാസം 5,000 രൂപ നിക്ഷേപിച്ചാൽ