മിണ്ടാപ്പൂച്ച കട മുടിക്കും

വാങ്ങാൻ വരുന്നവരോടു താൽപര്യപ്പെടുന്ന വസ്തുക്കളെക്കുറിച്ചു പറയേണ്ടതെല്ലാം പറഞ്ഞു വാങ്ങാൻ പ്രേരിപ്പിക്കുന്നില്ലെങ്കിൽ കടതുറന്നുവച്ചിട്ട് ഈച്ചയാട്ടി ഇരിക്കേണ്ടിവരും.

ഇരുമ്പുകടയിൽ തുരുമ്പെടുത്തിരിക്കുന്നവരെക്കുറിച്ചു കേട്ടിട്ടുണ്ടോ? അവർ തരിമ്പും രക്ഷപ്പെടില്ല. എക്കാലത്തും തുരുമ്പു പിടിച്ചിരിക്കുകയേയുള്ളൂ. തമാശകൾകൊണ്ടു ലോക്സഭയെ ചിരിപ്പിച്ച പീലുമോഡി എന്ന ലോക്സഭാംഗം നമുക്കുണ്ടായിരുന്നു. ഇന്ത്യൻ വാഹനങ്ങളിൽ ഒച്ചയില്ലാത്തതായി ഹോൺ മാത്രമേയുള്ളൂ എന്നു പറഞ്ഞാണ് അദ്ദേഹം ഒരിക്കൽ സഭയിൽ ചിരിപ്പൂരം ആഘോഷിച്ചത്. ഇതുപോലെ തുരുമ്പില്ലാത്ത സാധനസാമഗ്രികൾ വിൽക്കുന്ന ഇരുമ്പുകടയിൽ തുരുമ്പുള്ള ഏക സാധനമായി അതിന്റെ ഉടമസ്ഥൻ ഇരുന്നാലുള്ള അവസ്ഥ ഓർത്തു നോക്കൂ.