പെണ്ണോണം പൊന്നോണം

ഇത്തവണത്തെ ഓണത്തിന് വീട്ടിലെ സ്ത്രീകൾ വിശ്രമിക്കട്ടെ എന്ന് ആണുങ്ങൾ ആത്മാർഥമായി വിചാരിച്ചാലോ. അത് എത്ര വലിയ ഓണസമ്മാനമാകും...

- അങ്കിത കുറുപ്പ്

'അമ്മ ഓണത്തിനുണ്ടാക്കിയ പായസത്തിന്റെ രുചി.. 'ശ്രീമതിയുടെ കൂട്ടുകറി, ഒരു രക്ഷയുമില്ല...

ഒരോണം കഴിഞ്ഞാൽ മറ്റൊന്നിലേക്ക് എത്തുംവരെ സാധാരണ ആണുങ്ങളുടെ പറച്ചിലാണിത്. കാലത്തിനൊപ്പം ഓണത്തിന്റെ ട്രെൻഡ് മാറുന്നുണ്ടെങ്കിലും മാറാത്ത ഒന്നുണ്ട്, അത് വീടകങ്ങളിലെ അലിഖിതമായ ജോലിഭാരംതന്നെ. വീട് വൃത്തിയാക്കുന്നതു മുതൽ വിഭവസമൃദ്ധമായ ഓണ സദ്യവരെ ഇന്നും സ്ത്രീകളുടെ മാത്രം ഉത്തരവാദിത്തമാണ്.

കാലങ്ങളായി മാറ്റങ്ങൾക്കുള്ള ചർച്ചകൾ പുരോഗമിക്കുന്നുണ്ടെങ്കിലും കാര്യങ്ങളെല്ലാം പതിവുരീതി വിട്ടിട്ടില്ല. ഓണത്തിന് പത്തു നാൾ മുമ്പേ ആരംഭിക്കുന്ന അധികജോലി തിരുവോണം കഴിഞ്ഞാലും സ്ത്രീകളുടെ ചുമലിൽനിന്ന് ഒഴിയില്ല. മലയാളികൾ പുരോഗമന സമൂഹമെന്ന് അവകാശപ്പെടുമ്പോഴും ഒരു ഗ്ലാസ് കഴുകാൻ പോലും ആൺതരിയെ കിട്ടാത്ത അടുകളകളാണ് ഭൂരിഭാഗവും. ഈ ഓണക്കാലത്ത് അതൊന്ന് മാറ്റിപ്പിടിച്ചാലോ.