സമീകൃതമാവണം ഭക്ഷണം

ഭക്ഷണ ശീലമാണ് ആരോഗ്വമുള്ള ശരീരം നിലനിർത്തുന്നതിൽ നിർണ്ണായക പങ്കുവഹിക്കുന്നത്. പല ജീവിതശൈലി രോഗങ്ങളുടെയും വ്യാപ്തിയിൽ ലോക ശരാശരിയെ കേരളം മറികടന്നിട്ടുണ്ടെന്നത് ജീവിതരീതികളെ പുനർവിചിന്തനം ചെയ്യുന്നതിന് നമ്മെ പ്രേരിപ്പിക്കേണ്ടതുണ്ട്

ഭക്ഷണം കഴിച്ച് രോഗം വരുത്തിവെക്കുന്നവരായി മലയാളികൾ മാറിയിട്ടുണ്ട്. കൃത്യമായ ശാസ്ത്രീയ പിൻബലമില്ലാതെ പാരപര്യമായി തുടർന്നുപോരുന്ന ഭക്ഷണ മെനുവും അനാരോഗ്യ ഭക്ഷണങ്ങളുടെ അമിത അളവുമാണ് നമ്മുടെ ആരോഗ്യത്തെ പ്രതിസന്ധിയിലാക്കുന്നത്. ആരോഗ്യത്തിന്റെ അടിസ്ഥാനം ഭക്ഷണമായതിനാൽ വ്യക്തികളും കുടുംബങ്ങളും ഭക്ഷണത്തിൽ കാര്യമായ ശ്രദ്ധചെലുത്തിയാൽ കൂടുതൽ ആരോഗ്യമുള്ള ശരീരം വളർത്തിയെടുക്കാം.

എന്ത്, എങ്ങനെ കഴിക്കുന്നുവെന്നത് പ്രധാനമാണ്. രുചി മാത്രം അടിസ്ഥാനപ്പെടുത്തി തീർച്ചപ്പെടുത്തേണ്ടവയല്ല ഭക്ഷണ മെനു. രുചി ചെറുപ്പംതൊട്ട് ശീലിച്ചുവന്നതിന്റെ തുടർച്ച മാത്രമാണ്. അതിന് ആരോഗ്യവുമായി ബന്ധമുണ്ടായിക്കൊള്ളണമെന്നില്ല. അതിനാൽ, നമ്മുടെ ഭക്ഷണ മെനുവിനെ കുറച്ചുകൂടി ശാസ്ത്രീയമായി പരിഷ്കരിക്കാൻ നാം തയാറാവണം.

ജീവിതശൈലി രോഗങ്ങളായ രക്തസമ്മർദം, പ്രമേഹം, വൃക്ക, കരൾ, ഹൃദ്രോഗങ്ങൾ എന്നിവ കാൻസറിനേക്കാൾ അപകടകരമാണെന്നും മരണത്തിനുള്ള പ്രധാന കാരണങ്ങളായി മാറുമെന്നും ലോകാരോഗ്യ സംഘടന മുന്നറിയിപ്പ് നൽകുന്നു. പല ജീവിതശൈലി രോഗങ്ങളുടെയും വ്യാപ്തിയിൽ ലോക ശരാശരിയെ കേരളം മറികടന്നിട്ടുണ്ട് എന്നത് ജീവിതരീതികളെ പുനർവിചിന്തനം ചെയ്യുന്നതിന് നമ്മെ പ്രേരിപ്പിക്കേണ്ടതുണ്ട്. നമ്മുടെ തീൻ മേശകൾ എങ്ങനെ ആയിരിക്കണമെന്ന് കൃത്യമായ അവബോധവും നമുക്കുണ്ടാവേണ്ടതുണ്ട്.

നാം എന്ത് കഴിക്കണം?

പ്ലേറ്റിൽ ഭക്ഷണം ക്രമീകരിച്ച് സമീകൃത ആഹാരരീതി ശീലമാക്കേണ്ടതുണ്ട്. ഓരോ ദിവസവും പോഷകങ്ങൾ ശരിയായ അളവിൽ ലഭിക്കുന്നതിന് പ്ലേറ്റിന്റെ കാൽ ഭാഗം മതിയാവും ധാന്യങ്ങൾ. പകുതി ഭാഗം പച്ചക്കറികൾക്കും പഴ വർഗങ്ങൾക്കും മാറ്റിവെക്കാം. പയറുവർഗങ്ങൾ, മ ത്സ്യ-മാംസങ്ങൾ, മുട്ട, എണ്ണ, കൊഴുപ്പ് തുടങ്ങിയവയെല്ലാം കൂടി കാൽഭാഗവും ആവാം.