ഓപൺ ബുക്ക് എക്സാം പഠനമായിത്തിരുന്ന പരീക്ഷകൾ

പുസ്തകം തുറന്നുവെച്ചുള്ള പരീക്ഷയോ! അതു കോപ്പിയടിയല്ലേ? പിന്നെ പരീക്ഷയെന്തിന്?' ‘ഓപൺ ബുക്ക് പരീക്ഷ എന്നു കേൾക്കുമ്പോൾ ബഹുഭൂരിപക്ഷം പേർക്കും ആശങ്കയാണ്. കുട്ടികൾക്ക് സൗഹൃദാന്തരീക്ഷം ഒരുക്കുന്ന 'ഓപൺ ബുക്ക് പരീക്ഷയെക്കുറിച്ചറിയാം...

- ഡോ. കെ.എം. ഷരീഫ് assistant professor. farook training college. calicut

പുസ്തകം തുറന്നുവെച്ച് പരീക്ഷയെഴുതാം. ഇത് കേൾക്കുമ്പോൾ തന്നെ കുട്ടികൾക്ക് വലിയ ആഹ്ലാദം. ഇനിയൊന്നും പഠിക്കേണ്ടതില്ലല്ലോ. രക്ഷിതാക്കൾക്കാകട്ടെ ആശങ്കയും. പുസ്തകം തുറന്നുവെച്ച് പരീക്ഷ എഴുതാൻ അനുവദിച്ചാൽ പിന്നെ കുട്ടികൾ ഒന്നും പഠിക്കില്ലല്ലോ. ഓപൺ ബുക്ക് എക്സാം എന്താണെന്ന് മനസ്സിലാക്കാതെയാണ് ഈ ചിന്തകൾ എന്നതാണ് യാഥാർഥ്യം.

പഠിക്കാൻ നിർദേശിച്ച ഒരു പുസ്തകം തുറന്നുവെച്ച് പരീക്ഷ എഴുതലല്ല ഓപൺ ബുക്ക് എക്സാം. പരീക്ഷണമോ സമ്മർദമോ ആകാതിരിക്കേണ്ട ഒരു കാലഘട്ടത്തിൽ, ശാസ്ത്രീയമായി രൂപപ്പെട്ട നവീന ആശയങ്ങളിൽ ഒന്നാണ് പുസ്തകം തുറന്നുവെച്ചുള്ള പരീക്ഷയും.

എന്താണ് പരീക്ഷ.എന്താകണം പരീക്ഷ

ഈ ചോദ്യങ്ങൾക്ക് ഉത്തരം നൽകിയാലേ എങ്ങനെ ആയിരിക്കണം പരീക്ഷ എന്ന് ആലോചിക്കാൻ സാധിക്കൂ. ഒരാൾക്ക് എന്തറിയാം, അത് എത്രത്തോളം അറിയാം എന്ന് മനസ്സിലാക്കാനുള്ള ഉപാധികളിലൊന്നാണ് പരീക്ഷ. ഒരാൾ ഡ്രൈവിങ് പഠിച്ചിട്ടുണ്ടോ എന്നറിയാൻ അയാളെക്കൊണ്ട് വാഹനം ഓടിച്ചുനോക്കുകയാണ് വേണ്ടത്. അത് എല്ലാവർക്കും നിരീക്ഷിക്കാവുന്നതും അളക്കാവുന്നതുമായ ഒരു ടെസ്റ്റാണ്. നൈപുണികൾ പരിശോധിക്കുന്നതിന് ഇത്തരത്തിലുള്ള ടെസ്റ്റുകൾ നടത്തുക എളുപ്പമാണ്.

എന്നാൽ ഒരാൾ സ്വായത്തമാക്കിയ അറിവ്, മൂല്യം, മനോഭാവം എന്നിവയെല്ലാം ഇതുപോലെ പരിശോധിക്കുക എളുപ്പമല്ല. ഇതിനായി നടത്തുന്ന പലതരം തന്ത്രങ്ങളിൽ ഒന്നാണ് പരീക്ഷ. ക്ലാസിൽ നടക്കുന്ന പഠനപ്രവർത്തനങ്ങൾക്കെല്ലാം നിശ്ചയിക്കപ്പെട്ട ചില പഠന നേട്ടങ്ങളുണ്ടാകും. ഈ നേട്ടങ്ങൾ കുട്ടിയിലെത്തിയിട്ടുണ്ടോ എന്ന് ഉറപ്പുവരുത്തുന്ന തരത്തിൽ അവ പരിശോധിക്കപ്പെടേണ്ടതുണ്ട്. പോരായ്മകൾ കണ്ടെത്തി തിരുത്തുന്നതിനും പുതിയ അധ്യാപന തന്ത്രങ്ങൾ സ്വീകരിക്കുന്നതിനും അധ്യാപകർക്ക് മാർഗനിർദേശം നൽകുന്നതു കൂടിയാകണം പരീക്ഷ എന്നാണ് സങ്കൽപം. കുട്ടികൾക്ക് ക്ലാസ് കയറ്റത്തിനും സർട്ടിഫിക്കേഷനും ഉപയോഗിക്കുന്നതും ഈ പരീക്ഷതന്നെ.

പഠനത്തെക്കുറിച്ച് മാറിമാറി വരുന്ന കാഴ്ചപ്പാടുകൾ