લોકોના હાથમાં હવે લોકશાહીનો ‘અવસર’

ગુજરાત વિધાનસભાની ચૂંટણી આડે હવે ખૂબ ઓછો સમય બાકી રહ્યો છે. રાજકીય રીતે મહત્ત્વની બનવા જઈ રહેલી આ ચૂંટણીમાં ચૂંટણી પંચ પણ અવનવા પ્રયોગો લઈને આવ્યું છે. લોકોને મતદાન માટે પ્રેરિત કરવા અને લોકો સાથે સીધું જોડાણ સ્થાપિત કરવા પંચે અનોખી રીતો અજમાવી છે.

- આર્જવ પારેખ

ચૂંટણી એ લોકશાહીનો તહેવાર છે. આ તહેવારમાં સૌ કોઈ ઉત્સાહપૂર્વક ભાગ લે અને તેને ઊજવે એ સ્વસ્થ લોકશાહીનું લક્ષણ છે. દરેક ચૂંટણી વખતે ચૂંટણી પંચ મતદારોને આકર્ષવા માટે અવનવી પદ્ધતિઓ અપનાવે છે. જેનો આશય એટલો જ હોય છે કે નાગરિકો વધુમાં વધુ મતદાન કરે અને લોકશાહીને વધુ મજબૂત બનાવે. ગુજરાત વિધાનસભાની આવતા મહિને યોજાનારી ચૂંટણી માટે ચૂંટણી પંચે ‘અવસર લોકશાહીનો’ નામની ઝુંબેશ હાથ ધરી છે. જ્યાં AVSAR એટલે ઑલ વોટર્સ સ્પિરિટેડ, અવૅર ઍન્ડ રિસ્પોન્સિબલ (તમામ મતદારો જોશીલા, જાગૃત અને જવાબદાર). લોકો સાથે એક જોડાણ ઊભું કરી શકાય અને ચૂંટણી અંગે જાગૃતિ આવે એ માટે આ ઝુંબેશ અંતર્ગત વિવિધ પ્રકારની પ્રવૃત્તિઓ કરવામાં આવી રહી છે.