રાજકાજ

કેજરીવાલના જામીન, તેમના પ્રચારની કેટલી અસર થશે?

- ચાણક્ય

દિલ્હીના કેજરીવાલનો ગત સપ્તાહે જામીન પર છુટકારો થયો છે. સર્વોચ્ચ અદાલતે લોકસભાની ચૂંટણીની વિશેષ પરિસ્થિતિને લક્ષમાં રાખીને એનફોર્સ ડિરેક્ટોરેટના વિરોધ છતાં આ જામીન આપ્યા છે, એ અન્ય રીતે પણ અનોખી ઘટના છે. સર્વોચ્ચ અદાલતમાં જે કેસની સુનાવણી ચાલી રહી હતી એ તો કેજરીવાલની ધરપકડને પડકારતી અરજી અંગેની હતી. કેજરીવાલના વકીલ અભિષેક મનુ સિંઘવી કેજરીવાલ વતી રજૂઆત કરી રહ્યા હતા. તેમણે જામીનની માગણી કરી ન હતી. અદાલતે તેમને સૂચવ્યું કે, તમે જામીનની માગણી શા માટે કરતા નથી. અમે એ માટે વિચારી શકીએ. જે મુદ્દે સુનાવણી ચાલે છે એ લાંબી ચાલે તેમ છે. આમ એક પ્રકારે અદાલતે જ જામીન માટેનો તખ્તો તૈયાર કર્યો હતો. અદાલતે ઇડીના વકીલ પાસેથી કેજરીવાલને જામીન સામે તેમના અભિપ્રાય માગ્યા હતા. ઇડીના વકીલોએ સ્પષ્ટ રીતે જણાવ્યું હતું કે, નેતાઓ કે રાજકારણીઓ માટે જુદી કૅટેગરી ઊભી કરી શકાય નહીં. તેનાથી અલગ પરંપરા ઊભી થશે. ચૂંટણી પ્રચાર માટે જામીન આપી શકાય નહીં. ઈડીના વકીલોએ એમ પણ કહ્યું કે, ચૂંટણી પ્રચાર કરવો એ બંધારણીય અધિકાર નથી. પ્રચાર માટે જામીન આપવા કાનૂન સંગત પણ નથી. પ્રચાર કરવો એ મૌલિક અધિકાર પણ નથી.