આવા સંબંધની ઈમારતનો પાયો કેવો હોય?

અગાઉ સંયુક્ત કુટુંબપ્રથાને કારણે પરિવારમાં કોઈ દંપતીને ન બને તો પણ ઘરના બીજા સભ્યોની હૂંફથી એવા સંબંધ સચવાઈ જતા. હવે કુટુંબો તૂટી રહ્યાં છે એટલે આવી સપોર્ટ સિસ્ટમ પણ ઘસાઈ રહી છે

દુનિયા દિવસે દિવસે નાની થઈ રહી છે. ઝડપી વાહનવ્યવહાર સુવિધાને કારણે લોકો વચ્ચેનું ભૌગોલિક અંતર ઘટી રહ્યું છે તો સંદેશવ્યવહાર ક્ષેત્રે થયેલી ક્રાંતિને પગલે વિચારોનું આદાનપ્રદાન બહુ સરળ બની ગયું છે. એ રીતે બે અલગ અલગ ખંડમાં રહેતી પ્રજા પણ એકમેકને મળ્યા વગર એમની સંસ્કૃતિથી પરિચિત થવા લાગી છે. હથેળીમાં સમાઈ જતા મોબાઈલ ફોને સંદેશવ્યવહાર અને દુનિયાભરમાં બનતી જાતજાતની ઘટનાઓ વિશેની માહિતી સાથે મનોરંજનની પણ વિશાળ સૃષ્ટિ દરેક વ્યક્તિની આંખ સામે લાવીને મૂકી દીધી છે.