સુરતનાં જમણનું વાઈરલ ભ્રમણ..

સુરતના જમણની વાત કરીએ તો લોચો, ખમણ અને ઘારી આંખની સામે આવે, પરંતુ આ ત્રણ સિવાય પણ સુરતમાં એવી કેટલીક વાનગીઓ બને છે, જે સુરતનું જમણ..વાળી કહેવતને સાર્થક કરે છે, જેમ કે..

- અરવિંદ ગોંડલિયા (સુરત)

રાંદેરની આલુપૂરીઃ

વર્ષો પુરાણો એ જ સ્વાદ આલુપૂરી નામ સાંભળતાં જો તમે એવું વિચારતા હો કે આ તો બટેકા-પૂરી જેવું કંઈ હશે તો તમે ખોટા પડશો. પૂરી મેંદાની ખરી, પણ રગડામાં બટેટાનો ચોક્કસ ઉપયોગ થાય છે. એ ઉપરાંત, આ રસાવાળા શાકમાં વટાણા અને વિવિધ મસાલા હોય છે. ઉપરથી લસણ અને કોકમની ચટણી.

આલુપૂરીની કેવી રીતે શોધ થઈ એ વિશે મતમતાંતર છે. રાંદેરના ૬૦ વર્ષી હાશિમભાઈ કહે છેઃ ‘મારા દાદા અને પરદાદાએ પણ આલુપૂરી ખાધી છે એટલે કહી શકાય કે ૧૦૦ વર્ષ કરતાં વધુ સમયથી અહીં આલુપૂરી ખવાય છે. રાંદેરમાં જ આલુપૂરીની શોધ થઈ છે અને પછી ધીરે ધીરે એની સોડમ સુરતઆખામાં ને રાજ્યબહાર પણ ફેલાઈ ગઈ.’

૩૮ વર્ષથી ખાલિદભાઈની આલુપૂરી નામે લારી ચલાવતા ખાલિદભાઈના પુત્ર યુસુફભાઈ કહે છે: ‘વર્ષો વીતવા છતાં આલુપુરીની રૅસિપીમાં ખાસ નવું કંઈ નથી. હવે ઘણા લોકો ઉપરથી સેવ-પાપડી નાખે છે. કોઈ વળી ચીઝ પણ ખમણીને ભભરાવે. વણીને બનાવવામાં આવતી આલુપૂરી હવે મશીનથી પણ બનવા લાગી છે. રાંદેરમાં બનતી પૂરી અને શાક સુરતના અન્ય વિસ્તારમાં મગાવવામાં આવે છે.’

ફ્રૂટ ટીઃ હેલ્ધી ચૂસકી

મસાલાથી ભરપૂર ચા, હર્બલ ટી, ગ્રીન ટી આવાં નામ તો સાંભળ્યાં હશે, પણ મોજીલા સુરતમાં ભાગાતળાવ વિસ્તારમાં મનીષ પચ્ચીગર ફ્રૂટ ટી પિવડાવે છે. આના ઉદ્ભવ વિશે મનીષભાઈ કહે છે: ‘થોડા સમયથી આ રસ્તે આવતાં-જતાં ફળની લારીવાળા મિત્રો મને ચૅલેન્જ કરતા કે અમારા ફ્રૂટની ચા બનાવે તો માનીએ.. અને એક વાર સાચે જ બનાવી. બધાને સ્વાદ ગમ્યો એટલે ફ્રૂટ ટીની સફર કોરોના અગાઉ શરૂ થઈ. કેળાં, ચીકુ, કેરી, સીતાફળ, સફરજન, જેવાં ફળની ચામાં ચા, ખાંડ, દૂધ બધું જ હોય. હા, મોસંબી, સંતરા જેવાં ખટાશવાળાં ફળમાં દૂધ નથી હોતું.’